November 22, 2019
November 22, 2019
ദോഹ: നവംബര്‍ 20 മുതല്‍ ഡിസംബര്‍ 21 വരെ ഖത്തർ സന്ദർശിക്കുന്നവർക്ക് ഇക്കോണമി,ബിസിനസ് ക്ളാസുകളിൽ ഖത്തർ എയർവേയ്‌സ് ടിക്കറ്റ് നിരക്കിൽ ഇളവുകൾ പ്രഖ്യാപിച്ചു. ഡിസംബര്‍ അഞ്ച് മുതല്‍ 19 വരെ നടക്കുന്ന ഖത്തര്‍ ലൈവ് പരിപാടിയുടെ ഭാഗമായി പ്രമുഖരുടെ സംഗീത പരിപാടികളും വൈവിധ്യമാര്‍ന്ന ഫെസ്റ്റിവലുകളുമാണ് സംഘടിപ്പിക്കുന്നത്. ഖത്തര്‍ എയര്‍വേസിന്‍റെയും ഖത്തര്‍ നാഷനല്‍ ടൂറിസം കൗണ്‍സിലിന്‍റെയും ആഭിമുഖ്യത്തിലാണ് ഖത്തര്‍ ലൈവ്. കുവൈത്ത്, ഒമാന്‍ എന്നീ രാജ്യങ്ങളില്‍ നിന്നുള്ളവര്‍ക്ക് ഖത്തര്‍ എയര്‍വേസ് ഹോളിഡേയ്സ് പ്രത്യേക പാക്കേജുകളും ലഭ്യമാക്കിയിട്ടുണ്ട്. ഇതില്‍ വിമാന ടിക്കറ്റുകള്‍, വിമാനത്താവള ട്രാന്‍സ്ഫര്‍, ഹോട്ടലുകള്‍, സംഗീത പരിപാടി ടിക്കറ്റുകള്‍ എന്നിവ ഉള്‍പ്പെടും.
ലോകത്തിന്‍റെ വിവിധ ഭാഗങ്ങളില്‍ നിന്ന് ദോഹയിലേക്കുള്ളവര്‍ക്കും പ്രത്യേക പാക്കേജുകള്‍ ലഭ്യമാക്കും. സ്റ്റോപ് ഓവര്‍ കവറിങ് ഹോട്ടലുകള്‍ ഇതിലുള്‍പ്പെടും. കതാറ ഹോസ്പിറ്റാലിറ്റിയുമായി സഹകരിച്ചാണ് ഖത്തര്‍ എയര്‍വേസ് ഗ്രൂപ് പാക്കേജുകള്‍ തയാറാക്കിയത്. റിറ്റ്സ് കാള്‍ട്ടന്‍, ഷെറാട്ടന്‍ ഗ്രാന്‍ഡ് ദോഹ, ശര്‍ഖ് വില്ലേജ് ആന്‍ഡ് സ്പാ, അല്‍ മെസ്സില റിസോര്‍ട്ട് ആന്‍ഡ് സ്പാ, സിമൈസിമ റിസോര്‍ട്ട്, സീലൈന്‍ ബീച്ച്‌ റിസോര്‍ട്ട്, ദി അവന്യൂ ഹോട്ടല്‍, മൂവെന്‍പിക്ക് ഹോട്ടല്‍ തുടങ്ങിയ ഹോട്ടലുകളാണ് പാക്കേജിലുള്ളതെന്ന് ഖത്തര്‍ എയര്‍വേസ് വ്യക്തമാക്കി. പോപ് ഗായിക കാത്തി പെറി, സംഗീത ബാന്‍ഡായ മറൂണ്‍ 5, ഗായകരായ മലൂമ, ചെബ് ഖാലിദ് തുടങ്ങിയവര്‍ ഖത്തര്‍ ലൈവിന്‍റെ ഭാഗമായി ദോഹയിലെത്തുന്നുണ്ട്. ഡിസംബര്‍ 13 മുതല്‍ 19 വരെ ദോഹ എക്സിബിഷന്‍ ആന്‍ഡ് കണ്‍വെന്‍ഷന്‍ സെന്‍ററിലാണ് പരിപാടി.
24മത് അറേബ്യന്‍ ഗള്‍ഫ് കപ്പ് ചാമ്പ്യൻഷിപ്പിന്റെയും ഫിഫ ക്ലബ് ലോകകപ്പ് ചാമ്പ്യൻഷിപ്പിന്റെയും സമയത്താണ് ഖത്തര്‍ ലൈവ് നടക്കുന്നത്. ഡിസംബര്‍ അഞ്ചുമുതല്‍ ഏഴുവരെ കതാറയിലും ഡി.ഇ.സി.സി-യിലും ഖത്തര്‍ ലൈവിന്‍റെ ഭാഗമായി പരിപാടികള്‍ നടക്കും. ഖത്തരി സംഗീതജ്ഞന്‍ ഫഹദ് അല്‍ കുബൈസി, യാറ, ഉമര്‍ അല്‍ അബ്ദുല്ല, ഇബ്റാഹിം ദഷിത്, റഹ്മ റിയാദ് എന്നിവരാണ് പങ്കെടുക്കുന്നത്. ഇലക്‌ട്രോണിക് മ്യൂസിക് പ്രേമികള്‍ക്കായി ഖത്തര്‍ എയര്‍വേസും ക്യു.എന്‍.ടി.സി-യും ഡേ ഡ്രീം ഫെസ്റ്റിവലും സംഘടിപ്പിക്കുന്നുണ്ട്. ഇതാദ്യമായാണ് ഡേ ഡ്രീം ഖത്തറിലെത്തുന്നത്. ഡിസംബര്‍ 12 മുതല്‍ 20 വരെ റിറ്റ്സ് കാള്‍ട്ടന്‍ ദോഹയിലാണ് പരിപാടി.
