November 16, 2019
November 16, 2019
ദോഹ : അൽ ബിദാ പാർക്കിൽ കഴിഞ്ഞ രണ്ടു ദിവസമായി തുടരുന്ന സ്ട്രീറ്റ് ഫുഡ് ഫെസ്റ്റിവലിന് മികച്ച പ്രതികരണം. അവധിദിവസമായ ഇന്നലെ വൈകീട്ട് വിവിധ ദേശക്കാരായ ആയിരങ്ങളാണ് ഫെസ്റ്റിവൽ ആസ്വദിക്കാൻ ഫെസ്റ്റിവൽ നഗരിയിലേക്ക് ഒഴുകിയെത്തിയത്. വിവിധ രാജ്യങ്ങളുടെ രുചി വൈവിധ്യം ആസ്വദിക്കാനുള്ള നിരവധി ഫുഡ് സ്റ്റാളുകളും കുട്ടികൾ ഉൾപെടെ കുടുംബത്തോടൊപ്പമെത്തി വിനോദപരിപാടികളിൽ പങ്കെടുക്കാനുള്ള അവസരവുമാണ് ഫെസ്റ്റിവലിൽ ഒരുക്കിയിട്ടുള്ളത്. ഓരോ രാജ്യത്തിന്റെയും ഭക്ഷ്യവൈവിധ്യം ആസ്വദിക്കാൻ ഇവിടെ സൗകര്യമുണ്ട്. ഒപ്പം വിവിധ മത്സരങ്ങളിൽ പങ്കെടുത്തു സമ്മാനങ്ങൾ കൈക്കലാക്കാനും അവസരമുണ്ട്.കഴിഞ്ഞ വർഷം നടന്ന പ്രഥമ സ്ട്രീറ്റ് ഫുഡ് ഫെസ്റ്റിവലിന് ലഭിച്ച മികച്ച പ്രതികരണം കണക്കിലെടുത്താണ് ഇത്തവണയും ഫെസ്റ്റിവൽ സംഘടിപ്പിച്ചത്.
ഫയർ സ്റ്റേഷൻ ഗാലറിക്ക് പിറകിൽ 999 കഫേയ്ക്ക് അടുത്താണ് ഫെസ്റ്റിവൽ നടക്കുന്നത്. ഈ മാസം 13 ന് തുടങ്ങിയ ഫെസ്റ്റിവൽ 23 വരെ നീണ്ടുനിൽക്കും. വൈകീട്ട് നാല് മുതൽ രാത്രി 12 വരെയാണ് പ്രവേശനം.
