October 23, 2019
October 23, 2019
ദോഹ : കപ്പൽ വിനോദ സഞ്ചാരത്തിന് തുടക്കം കുറിച്ച് കൊണ്ട് ലോകത്തിന്റെ വിവിധ ഭാഗങ്ങളിൽ നിന്നുള്ള വിനോദ സഞ്ചാരികൾ കടൽ മാർഗം ദോഹയിൽ എത്തിതുടങ്ങി.ഇതോടനുബന്ധിച്ച് ദോഹ തുറമുഖത്ത് പുതിയ ക്രൂയിസ് പാസഞ്ചര്‍ ടെര്‍മിനലും തുറന്നിട്ടുണ്ട്. ജര്‍മനിയില്‍നിന്നുള്ള കൂറ്റന്‍ ആഡംബരക്കപ്പലായ മെയിന്‍ ഷിഫ് -5 ന്റെ വരവിന് തൊട്ടുപിന്നാലെയാണ് പുതിയ ടെര്‍മിനല്‍ ഉദ്ഘാടനം ചെയ്തത്.
6,000 ചതുരശ്ര മീറ്റര്‍ വിസ്തീര്‍ണമുള്ളതാണ് പുതിയ ക്രൂയിസ് പാസഞ്ചര്‍ ടെര്‍മിനൽ. അടുത്ത രണ്ട് സീസണുകളിലും താല്‍ക്കാലിക ടെര്‍മിനലായി ഇതു പ്രവര്‍ത്തിക്കും. ദോഹ പോര്‍ട് വിപുലീകരണ പ്രവൃത്തി 2022ല്‍ പൂര്‍ത്തിയാകുന്നതുവരെ ഇതു താല്‍ക്കാലിക ടെര്‍മിനലായി ഉപയോഗപ്പെടുത്താനാണു തീരുമാനം. ഈ സീസണില്‍ തുറമുഖത്തെത്താനിരിക്കുന്ന 74 കപ്പലുകളിലൊന്നാണ് മെയിന്‍ ഷിഫ് 5. കഴിഞ്ഞ സീസണിനെ അപേക്ഷിച്ച് കപ്പലുകളുടെ എണ്ണത്തില്‍ ഇത്തവണ 66 ശതമാനം വര്‍ധനവുണ്ട്. ക്രൂയിസ് ടൂറിസം വികസിപ്പിക്കാനുള്ള പദ്ധതികള്‍ക്കു സഹായകമാകുന്നതാണു പുതിയ താല്‍ക്കാലിക ടെര്‍മിനലെന്ന് ഗതാഗത-വാര്‍ത്താ വിനിമയ മന്ത്രി ജാസിം ബിന്‍ സെയ്ഫ് ആല്‍സുലൈതി പറഞ്ഞു.
2,35,000 യാത്രക്കാർ എത്തുമെന്നാണ് വിലയിരുത്തൽ. എംഎസ്‌സി ബെല്ലിസിമ, ജ്യുവൽ ഓഫ് ദ് സീസ്, മാറെല്ല ഡിസ്‌കവറി എന്നിവയുടെ ദോഹയിലേക്കുള്ള ആദ്യ യാത്ര കൂടിയാണിത്. 2020 മേയ് വരെയാണ് സീസൺ.
