April 15, 2020
April 15, 2020
ദോഹ : കൊറോണ വ്യാപനത്തിന്റെ പശ്ചാത്തലത്തിൽ തൊഴിലാളികളും തൊഴിലുടമകളും തമ്മിലുള്ള ഐക്യം പ്രധാനമാണെന്ന് ഖത്തർ തൊഴിൽ സാമൂഹ്യക്ഷേമ മന്ത്രാലയം ഓർമിപ്പിച്ചു.നിലവിലെ സാഹചര്യത്തിൽ പരസ്പരം കാര്യങ്ങൾ മനസിലാക്കി ഐക്യം ഊട്ടിയുറപ്പിച്ചാൽ മാത്രമേ സാമൂഹിക, സാമ്പത്തിക പ്രശ്നങ്ങളില്ലാതെ മുന്നോട്ട് പോകാൻ കഴിയൂ എന്ന് മന്ത്രാലയം ഓർമിപ്പിച്ചു. തൊഴിലാളികൾക്കും, തൊഴിലുടമകൾക്കും ഇതുവഴി നേട്ടമുണ്ടാകുമെന്നും മന്ത്രാലയം ഓർമിപ്പിച്ചു.ഇരുവിഭാഗങ്ങൾക്കുമിടയിലെ ബന്ധം ഊട്ടിയുറപ്പിക്കാൻ ചില നിർദ്ദേശങ്ങളും തൊഴിൽ വകുപ്പ് മുന്നോട്ടുവെച്ചിട്ടുണ്ട്.
പ്രവർത്തന നിയന്ത്രണമില്ലാത്ത സംരംഭങ്ങളിലെ തൊഴിലാളികൾക്ക് അടിസ്ഥാന ശമ്പളം അടക്കം എല്ലാ ആനുകൂല്യങ്ങളും ലഭ്യമാക്കണം. കോവിഡ് മൂലം തടസം സൃഷ്‌ടിച്ച മേഖലകളിൽ ഇരുകൂട്ടരും ചർച്ച ചെയ്ത് തൊഴിലാളികൾക്ക് വാർഷിക അവധിക്ക് അപേക്ഷിക്കുകയോ, ജോലിസമയം കുറയ്ക്കാനോ ആവശ്യപ്പെടാം. കരാർ പ്രകാരം ഭക്ഷണവും താമസവും തൊഴിലാളികൾക്ക് സൗജന്യമായി നൽകിവന്ന സ്ഥാപനങ്ങൾ അവധിയിലായാലും ഈ ആനുകൂല്യങ്ങൾ തുടർന്നും നൽകണം.
കോവിഡ് കാരണം ഐസൊലേറ്റിലോ ക്വറന്റിലോ കഴിയുന്ന തൊഴിലാളികൾക്കും ശമ്പളമടക്കമുള്ള ആനുകൂല്യങ്ങൾക്ക് അവകാശം ഉണ്ടെന്നും മന്ത്രാലയം കൂട്ടിച്ചേർത്തു. ഒരു തൊഴിലുടമ കരാറുകൾ റദ്ദ് ചെയ്യാൻ തീരുമാനിക്കുകയാണെങ്കിൽ മടക്കടിക്കറ്റ് അടക്കമുള്ള, തൊഴിൽ നിയമത്തിലെ എല്ലാ നിബന്ധനകളും പാലിക്കേണ്ടതുണ്ടെന്നും മന്ത്രാലയം ഓർമിപ്പിച്ചു. കരാർ റദ്ദ് ചെയ്താൽ പോലും നിലവിലെ സാഹചര്യത്തിൽ ആനുകൂല്യങ്ങൾ നൽകാൻ ഉടമ ബാധ്യസ്ഥനാണ് എന്നും മന്ത്രാലയം അറിയിച്ചു. നിർദേശങ്ങൾ ലംഘിക്കുന്നവർ കർശന നടപടി നേരിടേണ്ടി വരുമെന്ന് മുന്നറിയിപ്പ് നൽകിയ മന്ത്രാലയം തൊഴിലാളികൾക്ക് പരാതി അറിയിക്കാൻ 40280660 എന്ന 24 മണിക്കൂറും പ്രവർത്തിക്കുന്ന നമ്പറും ഏർപ്പെടുത്തി. പല ഭാഷകളിലും പ്രവർത്തനനസജ്ജമായ ഈ നമ്പറിൽ ടെക്സ്റ്റ്‌ മെസേജായും തൊഴിലാളികൾക്ക് പരാതികൾ അറിയിക്കാം. കൂടാതെ 92727 എന്ന നമ്പറിൽ 5 എന്നും ശേഷം മൊബൈൽ നമ്പറോ, വിസാനമ്പറോ അയച്ചും ഈ സൗകര്യം ഉപയോഗിക്കാം.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന ഖത്തർ വാട്സാപ്പ് നമ്പറിലേക്ക് നിങ്ങളുടെ പേര് സന്ദേശമായി അയക്കുക.
