October 15, 2019
October 15, 2019
ഫോട്ടോ : ഷിറാസ് സിതാര
ദോഹ: ഇന്നും ഖത്തറില്‍ ചിലയിടങ്ങളില്‍ ശക്തമായ കാറ്റിനും ഇടിയോടു കൂടിയ മഴയ്ക്കും സാധ്യത. കഴിഞ്ഞ ദിവസത്തേതിനു സമാനമായ കാലാവസ്ഥാ പ്രവചനമാണ് ഖത്തര്‍ മെട്രോളജി വകുപ്പ് (എം.ഇ.ടി) നൽകിയത്.'അൽ വസ്‌മി' എന്നറിയപ്പെടുന്ന ശൈത്യകാലത്തിന്റെ തുടക്കമായാണ് കാലാവസ്ഥാ മാറ്റത്തെ അധികൃതർ വിലയിരുത്തുന്നത്.
കഴിഞ്ഞ ദിവസം മധ്യ, പടിഞ്ഞാറന്‍ ഭാഗങ്ങളില്‍ ഇടിമിന്നലോടു കൂടിയ ശക്തമായ കാറ്റ് റിപ്പോര്‍ട്ട് ചെയ്തിരുന്നു. തെക്കുപടിഞ്ഞാറന്‍ മേഖലയിലാണ് മഴ ലഭിച്ചത്. ഇന്നും ഇതിന് സമാനമായ കാലാവസ്ഥ തുടരുമെന്നാണ് അറിയിപ്പ്. ജനങ്ങളോട് ജാഗ്രത പാലിക്കാനും സുരക്ഷാ നിര്‍ദേശങ്ങള്‍ പാലിക്കാനും എം.ഇ.ടി ആവശ്യപ്പെട്ടു.
ഇന്നത്തെ വിശദമായ കാലാവസ്ഥാ പ്രവചനം പ്രകാരം, പകല്‍ സമയങ്ങളിൽ ആപേക്ഷികമായി ചൂടുള്ള സാഹചര്യമായിരിക്കും. ഉച്ചയ്ക്കു ശേഷം മേഘം മൂടി ചിലയിടങ്ങളില്‍ മഴ പെയ്യും. കൂടെ ഇടിമിന്നലിനും പൊടിക്കാറ്റിനും സാധ്യതയുണ്ട്. മണിക്കൂറില്‍ ഒന്‍പതു മുതല്‍ 27 വരെ കി.മീറ്റര്‍ വേഗതയിലാകും കാറ്റ് വീശുക. ഇത് 55 കി.മീറ്റര്‍ വേഗമായി ഉയരാനും സാധ്യതയുണ്ട്.
