November 07, 2019
November 07, 2019
ന്യൂഡല്‍ഹി: ഇന്ത്യൻ വിമാന കമ്പനിയായ ഇന്‍ഡിഗോയും ഖത്തര്‍ എയര്‍വെയ്‌സും കോഡ്‌ഷെയര്‍ സഹകരണ കരാറില്‍ ഒപ്പുവച്ചു. മറ്റു കമ്പനികളുടെ വിമാനങ്ങൾ ഉപയോഗിച്ച് തങ്ങളുടെ യാത്രക്കാര്‍ക്കായി സര്‍വീസ് നടത്താനും സീറ്റുകള്‍ വാങ്ങാനും വിൽക്കാനും ഇരു കമ്പനികൾക്കും ഇതിലൂടെ കഴിയും.
ഇത്തരത്തിലുള്ള കോഡ്‌ഷെയര്‍ വിമാനങ്ങള്‍ ഡിസംബര്‍ 18 മുതലാണു സര്‍വീസ് ആരംഭിക്കുക. കരാര്‍ പ്രകാരം ഖത്തര്‍ എയര്‍വേസ് ഇന്‍ഡിഗോയുടെ വിമാനങ്ങളില്‍ ദോഹയ്ക്കും ഡല്‍ഹി, മുംബൈ, ഹൈദരാബാദ് എന്നീ ഇന്ത്യന്‍ നഗരങ്ങള്‍ക്കുമിടയില്‍ സര്‍വീസ് നടത്തും. ഇന്‍ഡിഗോയുമായി ഇത്തരത്തിൽ നയതന്ത്രപ്രാധാന്യമുള്ള കരാറില്‍ പങ്കാളിയാകാൻ കഴിഞ്ഞതിൽ അഭിമാനമുണ്ടെന്ന് ഖത്തര്‍ എയര്‍വേസ് ഗ്രൂപ്പ് സി.ഇ.ഒ അക്ബര്‍ അല്‍ബകര്‍ പറഞ്ഞു. ഇന്ത്യയിൽ കൂടുതല്‍ കേന്ദ്രങ്ങളിലേക്ക് സര്‍വീസ് നടത്താനായി ഇന്ത്യന്‍ അധികൃതരുമായി ചേര്‍ന്നു പ്രവര്‍ത്തിക്കുകയാണു ലക്ഷ്യമിടുന്നതെന്നും കമ്പനിയുടെ വളര്‍ച്ചയ്ക്ക് ഇതു വളരെ പ്രധാനമാണെന്നും അദ്ദേഹം കൂട്ടിച്ചേര്‍ത്തു.
നിലവില്‍ ദോഹയില്‍നിന്ന് 13 ഇന്ത്യന്‍ നഗരങ്ങളിലേക്ക് ഖത്തര്‍ എയര്‍വേസ് സര്‍വീസ് നടത്തുന്നുണ്ട്. അഹ്മദാബാദ്, അമൃത്സര്‍, ബംഗളൂരു, ചെന്നൈ, ഡല്‍ഹി, ഗോവ, ഹൈദരാബാദ്, കൊച്ചി, കൊല്‍ക്കത്ത, കോഴിക്കോട്, മുംബൈ, നാഗ്പൂര്‍, തിരുവനന്തപുരം എന്നിവിടങ്ങളിലേക്ക് പ്രതിവാരം 102 വിമാന സര്‍വീസുകളാണുള്ളത്.
