October 24, 2019
October 24, 2019
മസ്‌കത്ത്: അറബിക്കടലില്‍ ഉഷ്ണമേഖലാ ന്യൂനമര്‍ദം രൂപപ്പെടുന്നതായി ഒമാന്‍ കാലാവസ്ഥാ വകുപ്പിന്റെ മുന്നറിയിപ്പ്. അറബിക്കടലിന്റെ കിഴക്കന്‍ ഭാഗങ്ങളിലാണ് ന്യൂനമര്‍ദം രൂപപ്പെടുന്നത്. നാഷനല്‍ മള്‍ട്ടി ഹസാഡ് ഏളി വാണിങ് സെന്ററിന്റെ(എന്‍.എം.എച്ച്.ഇ.ഡബ്ല്യു.സി) വിലയിരുത്തലാണിതെന്ന് ഒമാന്‍ മെട്രോളജി വകുപ്പ്(എംഇടി) അറിയിച്ചു.
ഗുജറാത്തിലെ ഇന്ത്യന്‍ തീരത്തുനിന്ന് 200 കി.മീറ്റര്‍ അകലെയാണ് ന്യൂനമര്‍ദം രൂപപ്പെടുന്നത്. ഒമാന്റെ ഏറ്റവും അടുത്ത തീരമായ റഅസ് മുദ്‌റകയില്‍നിന്ന് 1,400 കി.മീറ്റര്‍ അകലെയാണിത്. ന്യൂനമര്‍ദത്തോടൊപ്പം മേഖലയില്‍ മണിക്കൂറില്‍ 31 മുതല്‍ 50 കി.മീറ്റര്‍ വേഗതയില്‍ കാറ്റ് വീശാനും സാധ്യതയുണ്ടെന്നും എം.ഇ.ടി പറയുന്നു.
വടക്കുപടിഞ്ഞാറു ഭാഗത്തേക്കു മാറി ഇന്ത്യന്‍ തീരത്തേക്കാണ് നിലവില്‍ ഉഷ്ണമേഖലാ ന്യൂനമര്‍ദത്തിന്റെ ഗതിയെന്നാണ് ഏറ്റവും പുതിയ കാലാവസ്ഥാ പ്രവചനം സൂചിപ്പിക്കുന്നത്. അടുത്ത 24 മണിക്കൂറിനിടയില്‍ ഇതു തീവ്രമായി ആഴത്തിലുള്ള ന്യൂനമര്‍ദത്തിനും സാധ്യത കാണുന്നുണ്ട്. പടിഞ്ഞാറു മാറി അറബിക്കടലിന്റെ മധ്യഭാഗത്തേക്ക് ഇതിന്റെ ഗതിമാറാനും സാധ്യതയുണ്ട്.
ന്യൂനമര്‍ദവുമായി ബന്ധപ്പെട്ട ഏറ്റവും പുതിയ വിവരങ്ങൾ എന്‍.എം.എച്ച്.ഇ.ഡബ്ല്യു.സി നിരീക്ഷിച്ചുവരുന്നുണ്ടെന്നും പുതിയ കാലാവസ്ഥാ ബുള്ളറ്റിനുകളും റിപ്പോര്‍ട്ടുകളും പിന്തുടരണമെന്നും പബ്ലിക് അതോറ്റി ഫോര്‍ സിവില്‍ ഏവിയേഷന്‍ പൊതുജനങ്ങളോട് നിർദേശിച്ചു.
