October 06, 2019
October 06, 2019
തിരുവനന്തപുരം : പ്രവാസി പുനരധിവാസ പദ്ധതിക്ക് കീഴിൽ നോർക്ക റൂട്സിന്റെ നേതൃത്വത്തിൽ വായ്പാ യോഗ്യതാ നിർണയ ക്യാമ്പ് സംഘടിപ്പിക്കുന്നു.കോഴിക്കോട് ജില്ലാ സഹകരണ ബാങ്കിന്റെ സഹകരണത്തോടെ,നാട്ടിൽ തിരിച്ചെത്തിയ പ്രാവാസികൾക്ക് സംരംഭങ്ങൾ തുടങ്ങുന്നതിന് സബ്‌സിഡിയോടെ വായ്പകളും മറ്റ് പരിശീലനവും നൽകാൻ ഉദ്ദേശിച്ചാണ് പരിപാടി നടത്തുന്നത്. ഒക്ടോബർ 15 ന് രാവിലെ 10 മണിക്ക് കല്ലായി റോഡിലെ സ്നേഹാഞ്ജലി ആഡിറ്റോറിയത്തിലാണ് പരിപാടി നടക്കുക.
പ്രവാസ ജീവിതം മതിയാക്കി നാട്ടിൽ സ്ഥിരതാമസമാക്കിയവർക്ക് തുടങ്ങാവുന്ന വിവിധ പദ്ധതികൾ പരിപാടിയിൽ പരിചയപ്പെടുത്തും.വിവിധ സംരംഭങ്ങൾ പരിചയപ്പെടുത്തുന്നതോടൊപ്പം യോഗ്യരായ അപേക്ഷകർക്ക് വായ്പ അനുവദിക്കുന്നതിനുള്ള നടപടിക്രമങ്ങൾ പൂർത്തിയാക്കാനും ആവശ്യമായ മാർഗ നിർദേശങ്ങൾ നൽകാനും സൗകര്യമൊരുക്കിയിട്ടുണ്ടെന്ന് നോർക്കാ റൂട്സ് വാർത്താ കുറിപ്പിൽ അറിയിച്ചു.
കോഴിക്കോട് ജില്ലാ സഹകരണ ബാങ്ക് പുതുതായി തുടങ്ങിയ പ്രവാസിമിത്രാ വായ്പാ പദ്ധതി പ്രകാരമുള്ള വായ്പകൾ നോർക്കയുടെ ശുപാർശ പ്രകാരം അർഹരായവർക്ക് ലഭിക്കും.തുടങ്ങാൻ ഉദ്ദേശിക്കുന്ന സംരംഭത്തിന്റെ സാധ്യതകൾ പരിശോധിച്ചു ബാങ്ക് നിബന്ധനകൾക്ക് വിധേയമായാണ് വായ്പ അനുവദിക്കുക.
സംരംഭകർക്ക് മൂലധന,പലിശ സബ്‌സിഡികൾ ലഭ്യമാക്കുന്ന പദ്ധതിക്ക് കീഴിൽ സംരംഭരാകാൻ താൽപര്യമുള്ളവർ തുടങ്ങാൻ ഉദ്ദേശിക്കുന്ന പദ്ധതിയുടെ അടങ്കൽ തുക ഉൾപെടെയുള്ള ലഘു വിവരണവും കുറഞ്ഞത് രണ്ടു വർഷത്തെ വിദേശവാസം തെളിയിക്കുന്ന പാസ്‌പോർട്ടിന്റെ പകർപ്പും മൂന്ന് പാസ്പോർട്ട് സൈസ് ഫോട്ടോയും സഹിതമാണ് പരിപാടിയിൽ പങ്കെടുക്കാൻ എത്തേണ്ടത്.താല്പര്യമുള്ളവർ നോർക്കാ റൂട്സിന്റെ വെബ്‌സൈറ്റായ www.norkaroots.org വഴി പേർ രജിസ്റ്റർ ചെയ്യണം.
കൂടുതൽ വിവരങ്ങൾക്ക് സി.എം.ഡി സഹായ കേന്ദ്രം 0471 2329738,നോർക്ക റൂട്സ് 1800 425 3939 (ഇന്ത്യയിൽ നിന്നും) 0091 88020 12345 (വിദേശത്ത് നിന്നും മിസ്ഡ് കോൾ സേവനം) 0495 2304 885,2304 882 (ടോൾ ഫ്രീ) എന്നീ നമ്പറുകളിൽ ബന്ധപ്പെടാനാവും.
