March 11, 2020
March 11, 2020
ദോഹ : ഖത്തറിൽ സമൂഹ മാധ്യമങ്ങൾ വഴി വ്യാജ വാർത്തകൾ പ്രചരിപ്പിക്കുന്നവർക്കെതിരെ ആഭ്യന്തര മന്ത്രാലയം നടപടികൾ തുടങ്ങി. അടിസ്ഥാനരഹിതവും തെറ്റിദ്ധാരണ പരത്തുന്നതുമായ വിവരങ്ങൾ സമൂഹമാധ്യമങ്ങൾ വഴി പങ്കുവെച്ച ഏതാനും പേർക്കെതിരെയാണ് മന്ത്രാലയം നടപടി സ്വീകരിച്ചത്. ഇവർക്കെതിരായ കേസുകൾ പബ്ലിക് പ്രോസിക്യൂഷന് കൈമാറിയതായും മന്ത്രാലയം അറിയിച്ചു.
കോവിഡ് 19 വൈറസ് വ്യാപനവുമായി ബന്ധപ്പെട്ട് തെറ്റായ വിവരങ്ങൾ പ്രചരിപ്പിക്കുന്നത് ഗുരുതരമായ കുറ്റകൃത്യമായി കണക്കാക്കുമെന്ന് ആഭ്യന്തര മന്ത്രാലയം ഈയിടെ മുന്നറിയിപ്പ് നൽകിയിരുന്നു.ഖത്തർ ജനതയുടെ സുരക്ഷയെ ബാധിക്കുന്നതാണ് ഇത്തരം നടപടികളെന്ന് അധികൃതർ വ്യക്തമാക്കി.രാജ്യത്ത് പുതിയ കൊറോണ വൈറസ് കേസുകൾ റിപ്പോർട്ട് ചെയ്യപ്പെടുന്ന സാഹചര്യത്തിൽ സമൂഹമാധ്യമങ്ങൾ വഴി തെറ്റായ വാർത്തകൾ പ്രചരിക്കുന്നത് പൊതുജനങ്ങൾക്കിടയിൽ അനാവശ്യമായ പരിഭ്രാന്തിയും ആശയക്കുഴപ്പവും സൃഷ്ടിക്കുന്നതായും മന്ത്രാലയം അറിയിച്ചു.
