January 08, 2020
January 08, 2020
കുവൈത്ത് സിറ്റി : കുവൈത്തിന്റെ ഔദ്യോഗിക വെബ്‌സൈറ്റായ കുന (കുവൈത്ത് ന്യൂസ് ഏജൻസി) യുടെ ഔദ്യോഗിക ട്വിറ്റർ അക്കൗണ്ട് ഹാക്ക് ചെയ്തതായി റിപ്പോർട്ട്. അജ്ഞാതർ ഹാക്ക് ചെയ്ത ട്വിറ്റർ അക്കൗണ്ടിൽ കുവൈത്തിൽ നിന്നും അമേരിക്കൻ സേന പിന്മാറുന്നുവെന്ന വാർത്ത കുവൈത്ത് പ്രതിരോധ മന്ത്രിയുടെ പേരിൽ പ്രചരിച്ചതോടെയാണ് വിശദീകരണവുമായി അധികൃതർ രംഗത്തെത്തിയത്. ഇതേതുടർന്ന് കുന യുടെ ട്വിറ്റർ അക്കൗണ്ട് ഹാക്ക് ചെയ്യപ്പെട്ടതായി സർക്കാർ വക്താവ്‌ താരിഖ് അൽ മുസറാം സ്ഥിരീകരിച്ചു.
കുവൈത്തിൽ നിന്ന് 3 ദിവസത്തിനകം അമേരിക്കൻ സൈന്യത്തെ പിൻവലിക്കുന്നതായി ഉപപ്രധാനമന്ത്രിയും പ്രതിരോധമന്ത്രിയുമായ ഷെയ്ഖ് അഹമ്മദ് അൽ മൻസൂറിന്റെ പേരിലാണു വ്യാജ പ്രസ്താവന പ്രസിദ്ധീകരിച്ചത്‌. എന്നാൽ, ഇത്‌ സംബന്ധിച്ച്‌ തങ്ങൾ ഒരു വാർത്തയും നൽകിയിട്ടില്ലെന്ന് കുന അധികൃതർ വ്യക്തമാക്കി. വിഷയത്തിൽ അന്വേഷണം ആരംഭിച്ചതായും അധികൃതർ അറിയിച്ചു. നിലവിലെ സാഹചര്യത്തിൽ കുവൈത്തിന്റെ ഔദ്യോഗിക സൈറ്റിൽ പ്രത്യക്ഷപ്പെട്ട ഇത്തരമൊരു വാർത്ത വൻ പ്രാധാന്യത്തോടെയാണു അന്താരാഷ്ട്രമാധ്യമങ്ങൾ പ്രസിദ്ധീകരിച്ചത്‌.
