September 29, 2020
September 29, 2020
കുവൈത്ത് സിറ്റി : കുവൈത്ത് അമീർ ഷെയ്ഖ് സബാഹ് അൽ അഹമ്മദ് അൽ സബാഹ് ( 91) അന്തരിച്ചു.കുവൈത്ത് റോയൽ പാലസ് ആണ് ഇക്കാര്യം അറിയിച്ചത്.രണ്ടു മാസമായി അമേരിക്കയിൽ ചികിത്സയിലായിരുന്നു. ശസ്ത്രക്രിയക്ക് ശേഷമുള്ള തുടർ ചികിത്സയ്ക്കായി കഴിഞ്ഞ ജൂലായിലാണ് കുവൈത്ത് അമീർ അമേരിക്കയിലേക്ക് പോയത്.
ഗൾഫ് മേഖലയിൽ സമാധാന നീക്കങ്ങൾക്ക് ചുക്കാൻ പിടിച്ച അനിഷേധ്യ നേതാവാണ് ഇതോടെ വിടവാങ്ങിയത്.ലോകത്ത് ഏറ്റവുമധികം കാലം ഒരു രാജ്യത്തിന്റെ വിദേശകാര്യ മന്ത്രിയായി തുടർന്ന നേതാവെന്ന അപൂർവ പദവിയും ഷെയ്ഖ് സബാഹിന് മാത്രം അവകാശപ്പെട്ടതാണ്.40 വർഷമാണ് അദ്ദേഹം കുവൈത്തിന്റെ വിദേശകാര്യ മന്ത്രിയായി തുടർന്നത്.
ഖത്തറിനെതിരെ സൗദിയുടെ നേതൃത്വത്തിൽ ചില അയൽരാജ്യങ്ങൾ ഉപരോധം ഏർപെടുത്തിയപ്പോൾ തുടക്കം മുതൽ അനുരഞ്ജന ശ്രമങ്ങൾക്ക് നേതൃത്വം നൽകിയത് ഷെയ്ഖ് സബാഹ് ആയിരുന്നു.അതുകൊണ്ടു തന്നെ കുവൈത്ത് അമീറിന്റെ വിയോഗം ഖത്തറിന് തീരാനഷ്ടമാണ്.പ്രശ്നങ്ങളില്ലാത്ത ഗൾഫ്,സമാധാനപൂർണമായ ലോകം എന്ന ആശയത്തെ മുൻ നിർത്തിയാണ് അദ്ദേഹം ജീവിതകാലം മുഴുവൻ പ്രവർത്തിച്ചത്.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ +974 66200167 എന്ന വാട്സ്ആപ് നമ്പറിലേക്ക് സന്ദേശമയക്കുക
