September 11, 2019
September 11, 2019
കുവൈത്ത് സിറ്റി : കുവൈത്തിലെ പ്രവാസി സംഘടനകളും ഇന്ത്യൻ സ്ഥാനപതിയും തമ്മിൽ പോര് മുറുകുന്നു.ഇന്ത്യൻ സ്ഥാനപതി പ്രതികാര മനോഭാവത്തോടെ പെരുമാറുന്നതായാണ് സംഘടനാ നേതാക്കളുടെ പരാതി. പ്രവാസി സംഘടനകളെ എംബസി ലിസ്റ്റിൽ നിന്ന് ഒഴിവാക്കിയതിനെതിരെ പരാതിപ്പെട്ടതാണ് ഇതിന് കാരണമെന്ന് വിവിധ സംഘടനാ നേതാക്കൾ പറയുന്നു.
വർഷങ്ങളായി കുവൈത്തില്‍ പ്രവർത്തിച്ചുവരുന്ന സംഘടനകളെ ലിസ്റ്റിൽ നിന്ന് എംബസി ഒഴിവാക്കിയതായി കാണിച്ച് ചില സംഘടനാ നേതാക്കൾ രാഷ്ട്രപതിക്കും കേന്ദ്ര സർക്കാരിനും പരാതി നൽകിയിരുന്നു.ഇതേ തുടർന്ന് എംബസി ഇവർക്ക് വിശദീകരണ നോട്ടീസ് അയച്ചിട്ടുണ്ട്. ഇന്ത്യൻ സ്ഥാനപതിക്കെതിരെ പ്രവർത്തിക്കുന്നതായി കാണിച്ച് ലോക കേരളസഭാംഗം ഉൾപ്പെടെയുളളവർക്കാണ് ഇന്ത്യൻ സ്ഥാനപതി നോട്ടീസ് നൽകിയത്.കുവൈത്ത് സർക്കാരിനും അംബാസിഡർ പരാതി നൽകിയിട്ടുണ്ട്. ഇതേതുടർന്ന് ഇക്കാര്യത്തിൽ ഉടൻ വിശദീകരണം നൽകണമെന്ന് കുവൈത്തിലെ അന്വേഷണ ഏജൻസി ഇവരോട് ആവശ്യപ്പെട്ടതായാണ് വിവരം.
