June 23, 2020
June 23, 2020
ഷാർജ :കണ്ണൂര്‍ സ്വദേശിയായ വ്യവസായിയെ ഷാര്‍ജയില്‍ കെട്ടിടത്തില്‍ നിന്നും വീണുമരിച്ചനിലയില്‍ കണ്ടെത്തി. കണ്ണൂര്‍ പനങ്കാവ് ചിറയ്ക്കൽ ടി.പി. ഹൗസിൽ അജിത് തയ്യിൽ (55) ആണ് 25 നിലയുള്ള കെട്ടിടത്തിൽ നിന്നും താഴേക്ക് ചാടി ആത്മഹത്യ ചെയ്തത്.അജിത്തിന്റെ മരണം ആത്മഹത്യയാണെന്ന് ഷാർജ പോലീസ് സ്ഥിരീകരിച്ചതായി ഗൾഫ് ന്യൂസ് പത്രം റിപ്പോർട്ട് ചെയ്തു.
ദുബായിൽ സ്‌പെയ്‌സ് മാക്സ് കോൺട്രാക്റ്റിങ് കമ്പനിയുടെ ഉടമയാണ്. . ദുബൈയില്‍ സ്വന്തമായുള്ള മഡോണ വില്ലയിലായിരുന്നു അജിത്ത് താമസിച്ചിരുന്നത്. തിങ്കളാഴ്ച ഷാര്‍ജ ജമാല്‍ അബ്ദുള്‍നാസര്‍ സ്ട്രീറ്റിലെ 25 നിലയിലുള്ള കെട്ടിടത്തില്‍ നിന്ന് വീണ് മരിച്ച നിലയിലാണ് മൃതദേഹം കണ്ടെത്തിയത്. ഷാര്‍ജ പോലീസും പാരാമെഡിക്കല്‍ വിഭാഗവും സ്ഥലത്തെത്തി മൃതദേഹം മോര്‍ച്ചറിയിലേക്ക് മാറ്റുകയായിരുന്നു.
ഗോഡൗണ്‍, ലോജിസ്റ്റിക്ക്, വര്‍ക്ക് ഷോപ്പ്, ഫാക്ടറി, കോള്‍ഡ് സ്റ്റോറേജ് സൗകര്യം തുടങ്ങിയ വിപുലമായ സംവിധാനങ്ങളുള്ള സ്‌പെയ്‌സ് മാക്സ് വിവിധ ഗള്‍ഫ് രാജ്യങ്ങളുമായി ബന്ധപ്പെട്ട് പ്രവര്‍ത്തിക്കുന്നു.ബിസിനസുമായി ബന്ധപ്പെട്ട് കടുത്ത സാമ്പത്തിക പ്രതിസന്ധികൾ നേരിട്ടിരുന്നതായി സൂചനയുണ്ട്. കണ്ണൂരില്‍ അടുത്തിടെ സ്വന്തമായി വീടെടുത്ത് താമസവും തുടങ്ങിയിരുന്നു. കുടുംബം ദുബൈയിലാണുള്ളത്, ഭാര്യ ബിന്ദു. മകന്‍ എന്‍ജിനീയറിങ് പഠനം കഴിഞ്ഞ് അജിത്തിന്റെ കൂടെ ജോലി ചെയ്യുന്നു. മകള്‍ പഠിക്കുകയാണ്..
സാമ്പത്തിക പ്രതിസന്ധിയെ തുടർന്ന് കഴിഞ്ഞ രണ്ടു മാസത്തിനിടെ യു.എ.ഇയിൽ ആത്മഹത്യ ചെയ്യുന്ന രണ്ടാമത്തെ മലയാളി ബിസിനസുകാരനാണ് അജിത് തയ്യിൽ.വയനാട് സ്വദേശിയും ബിസിനസ് പ്രമുഖനുമായ ജോയ് അറക്കൽ കഴിഞ്ഞ ഏപ്രിലിൽ കെട്ടിടത്തിൽ നിന്നും ചാടി ജീവനൊടുക്കിയിരുന്നു.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന ഖത്തർ വാട്സാപ്പ് നമ്പറിലേക്ക് നിങ്ങളുടെ പേര് സന്ദേശമായി അയക്കുക
