December 29, 2018
December 29, 2018
ബഗ്ദാദ്: അപ്രതീക്ഷിത സന്ദര്‍ശനവുമായി യു.എസ് പ്രസിഡന്റ് ഡൊണാള്‍ഡ് ട്രംപ് ഇറാഖില്‍. ട്രംപിന്റെ സന്ദര്‍ശനത്തെ അപലപിച്ച് ഇറാഖിലെ രാഷ്ട്രീയ-സൈനിക നേതൃത്വം രംഗത്തെത്തുകയും ചെയ്തു. ബുധനാഴ്ചയാണ് ഇറാഖിലെ യു.എസ് സൈനിക ക്യാംപ് സന്ദര്‍ശിക്കാനായി ട്രംപ് ഭാര്യ മെലാനിയയും അടങ്ങിയ സംഘം ബഗ്ദാദിലെത്തിയത്. സൈനികരുടെ സേവനത്തിന് നന്ദി അറിയിക്കാനാണ് ട്രംപ് എത്തിയത്.
അതേസമയം, ഇറാഖില്‍ നിന്നും സൈന്യത്തെ പിന്‍വലിക്കില്ലെന്നും സിറിയയില്‍ നിന്നും യു.എസ് സൈന്യത്തെ പിന്‍വലിക്കാനുള്ള തീരുമാനത്തില്‍ ഉറച്ചു നില്‍ക്കുന്നതായും അദ്ദേഹം പറഞ്ഞു. അധികാരത്തിലേറി രണ്ട് വര്‍ഷം പിന്നിടുമ്പോള്‍ ആദ്യമായാണ് ഇറാഖില്‍ വിന്യസിച്ച യു.എസ് സൈന്യത്തെ കാണാന്‍ കുശലാന്വേഷണം നടത്താനും ട്രംപ് എത്തിയത്.
വേള്‍ഡ് ട്രേഡ് സെന്റര്‍ ആക്രമണത്തിനു ശേഷമാണ് വിവിധ അറബ് രാജ്യങ്ങളില്‍ യു.എസ് സൈന്യത്തെ വിന്യസിച്ചത്. ഇതിന്റെ ഭാഗമായാണ് ഇറാഖിലും സൈനികരെ വിന്യസിച്ചത്. അതീവ രഹസ്യമായും സുരക്ഷയോടെയുമായിരുന്നു ട്രംപിന്റെ ഇറാഖ് സന്ദര്‍ശനം.
