December 16, 2019
December 16, 2019
ദോഹ : ഖത്തറും സൗദിയും തമ്മിൽ നടന്ന ചർച്ചകൾ ഗൾഫ് പ്രതിസന്ധി പരിഹരിക്കുന്നതിൽ ഏറെ പ്രയോജനം ചെയ്യുമെന്ന് ഇറാൻ വിദേശകാര്യ മന്ത്രി ജാവേദ് ശരീഫ് പറഞ്ഞു. ദോഹ ഫോറത്തിൽ പങ്കെടുക്കാനെത്തിയ അദ്ദേഹം റോയിട്ടേഴ്‌സ് റിപ്പോർട്ടറുടെ ചോദ്യത്തിനുള്ള മറുപടിയായാണ് ഇക്കാര്യം പറഞ്ഞത്. സൗദിയും ഖത്തറും തമ്മിൽ ഈയിടെ നടന്ന ചർച്ചകൾ ഗൾഫ് മേഖലയ്ക്ക് ഗുണം ചെയ്യുമോ എന്ന ചോദ്യത്തിന് 'തീർച്ചയായും ഗുണം ചെയ്യു'മെന്നായിരുന്നു ജാവേദ് ഷെരീഫിന്റെ മറുപടി.
ചില 'അഭിനേതാക്കൾ' മേഖലയിൽ അധികാരമുറപ്പിക്കാൻ നടത്തുന്ന ശ്രമങ്ങൾ ഗൾഫ് മേഖലയ്ക്ക് മുഴുവൻ നാശനഷ്ടങ്ങളുണ്ടാക്കിയതായും ഇറാൻ വിദേശകാര്യ മന്ത്രി പറഞ്ഞു. ഇറാൻ,കുവൈത്ത് എന്നീ രാജ്യങ്ങൾക്ക് നേരെ ഇറാഖിലെ സദ്ധാം ഹുസ്സൈൻ നടത്തിയ ആക്രമണം, ഖത്തറിനെതിരായ ഉപരോധം, യമനിലെ പ്രശ്നങ്ങൾ എന്നിവ മേഖലയിൽ ആധിപത്യമുറപ്പിക്കാനുള്ള തെറ്റായ നീക്കങ്ങളുണ്ടാക്കിയ ദുരന്തങ്ങളാണെന്നും അദ്ദേഹം കൂട്ടിച്ചേർത്തു. ഖത്തറും അയൽ രാജ്യങ്ങളും തമ്മിലുള്ള പ്രശ്നങ്ങൾ പരിഹരിക്കാൻ അമേരിക്കയും കുവൈത്തും നടത്തിയ മധ്യസ്ഥ ശ്രമങ്ങളെ ദുർബലപ്പെടുത്തിയത് ഇറാനെതിരായ അമേരിക്കയുടെ നീക്കമാണെന്നും ജാവേദ് ഷെരീഫ് കുറ്റപ്പെടുത്തി.
ഗൾഫ് പ്രതിസന്ധി പരിഹരിക്കുന്നതുമായി ബന്ധപ്പെട്ട് സൗദി അധികൃതരുമായി ചർച്ച നടത്തിയതായും വിഷയത്തിൽ നേരിയ പുരോഗതി ഉണ്ടായതായും ഖത്തർ വിദേശകാര്യ മന്ത്രിയും ഉപ പ്രധാനമന്ത്രിയുമായ ഷെയ്ഖ് മുഹമ്മദ് ബിൻ അബ്ദുൽ റഹ്‌മാൻ അൽതാനി ഈയിടെ സ്ഥിരീകരിച്ചിരുന്നു.
ഖത്തറിൽ നിന്നും ഗൾഫ് - അറബ് മേഖലയിൽ നിന്നുമുള്ള ഏറ്റവും പുതിയ വാർത്തകൾ മുടങ്ങാതെ ലഭിക്കാൻ ഇതുവരെ ഒരു ഗ്രൂപ്പിലും അംഗങ്ങളാവാത്തവർ +974 66200167 എന്ന വാട്സ് ആപ് നമ്പറിലേക്ക് സന്ദേശം അയക്കുക.
