August 31, 2019
August 31, 2019
ജനീവ : ആണവ കരാറിന്റെ പരിധി മറികടന്ന് ഇറാന്‍ വീണ്ടും ആണവ സമ്പുഷ്ടീകരണം നടത്തുന്നതായി യു.എന്‍ ആണവ നിരീക്ഷണ സമിതി ആരോപിച്ചു.ഇന്റര്‍നാഷനല്‍ ആറ്റമിക് എനര്‍ജി ഏജന്‍സി(ഐ.എ.ഇ.എ)യുടെ ഈ വര്‍ഷത്തെ മൂന്നാം പാദ റിപ്പോര്‍ട്ടിലാണ് ഇക്കാര്യം പറയുന്നത്.
2015 ലെ ആണവ കരാറില്‍ നിശ്ചയിച്ച പരിധിയും കടന്ന് ഇറാന്‍ യുറേനിയം സമ്പുഷ്ടീകരണം നടത്തുകയും സമ്പുഷ്ടീകരിച്ച യുറേനിയം സംഭരിച്ചുവയ്ക്കുകയും ചെയ്യുന്നതായാണ് ഐ.എ.ഇ.എ റിപ്പോര്‍ട്ടിൽ പറയുന്നത്.
അമേരിക്ക കരാറില്‍നിന്നു പിന്മാറി ഉപരോധം ഏര്‍പ്പെടുത്തിയതിനു തിരിച്ചടിയായി ഇറാന്‍ ഘട്ടംഘട്ടമായി കരാറില്‍നിന്നു പിന്നോട്ടുപോകുന്നതായാണു വ്യക്തമാകുന്നതെന്നും റിപ്പോര്‍ട്ടില്‍ പറയുന്നു.അതേസമയം,ഉപരോധം തുടരുകയാണെങ്കിൽ കരാർ പ്രകാരമുള്ള പരിധി ലംഘിക്കുമെന്ന് ഇറാൻ നേരത്തെ മുന്നറിയിപ്പ് നൽകിയിരുന്നു.അമേരിക്കൻ ഉപരോധത്തിനെതിരെ കരാറിൽ ഒപ്പുവെച്ച മറ്റു സഖ്യരാജ്യങ്ങള്‍ നടപടി കൈക്കൊണ്ടില്ലെങ്കില്‍ ഇനിയും പരിധി കടന്നുള്ള ആണവ സമ്പുഷ്ടീകരണം നടത്തുമെന്നും ഇറാന്‍ മുന്നറിയിപ്പ് നല്‍കിയിട്ടുണ്ട്.
