May 06, 2020
May 06, 2020
ദോഹ : കോവിഡ് വ്യാപനം തടയുന്നതിനായി അടച്ചിട്ട ഖത്തറിലെ വ്യവസായ മേഖലയിൽ കൂടുതല്‍ ഇളവുകള്‍ അനുവദിച്ചു.ഒന്ന് മുതൽ മൂന്ന് വരെയുള്ള സ്ട്രീറ്റുകള്‍ നേരത്തേ തുറന്നിരുന്നു. സ്ട്രീറ്റ് ഒന്ന് മുതല്‍ 32വരെയുള്ള പ്രദേശങ്ങളിലാണ് ഇപ്പോൾ ഇളവുകള്‍ പ്രഖ്യാപിച്ചത്. ഇന്‍ഡസ്ട്രിയല്‍ ഏരിയ ഘട്ടംഘട്ടമായി തുറക്കുന്നതിന്റെ ഭാഗമായാണ് നടപടി.
ലോക്ക് ഡൗണ്‍ ചെയ്ത പ്രദേശത്തേക്ക് വരുന്നതിനും പോകുന്നതിനുമുള്ള നിയന്ത്രണങ്ങളിലാണ് ഇളവ് വരുത്തിയത്. ഇതനുസരിച്ച് ഈ ഭാഗങ്ങളിൽ ജോലി ചെയ്യുകയും പുറത്തു താമസിക്കുകയും ചെയ്യുന്നവര്‍ക്കും, പുറത്ത് ജോലി ചെയ്യുകയും ഇന്‍ഡസ്ട്രിയല്‍ ഏരിയയില്‍ താമസിക്കുകയും ചെയ്യുന്നവര്‍ക്കും അകത്തേക്കും പുറത്തേക്കും പോകാൻ അനുമതിയുണ്ടാവും. പ്രദേശത്ത് പ്രവര്‍ത്തിക്കുന്ന കമ്പനികള്‍ക്ക് വാണിജ്യ മന്ത്രാലയത്തില്‍ അപേക്ഷ നല്‍കി സാധനങ്ങളും ഉപകരണങ്ങളും ഇന്‍ഡസ്ട്രിയല്‍ ഏരിയയിലേക്കു കൊണ്ടുവരാനും കഴിയും.
അതേസമയം,എല്ലാ തൊഴിലാളികളം കൊറോണ ആപ്പായ ഇഹ്തിറാസ് ഡൗണ്‍ലോഡ് ചെയ്തുവെന്ന് തൊഴിലുടമകള്‍ ഉറപ്പ് വരുത്തണം. ആപ്പ് ഡൗണ്‍ലോഡ് ചെയ്യാത്തവരെ ഇൻഡസ്ട്രിയൽ ഏരിയയിലേക്ക് പ്രവേശിക്കാനോ പുറത്തേക്ക് പോകാനോ അനുവദിക്കില്ല.
നിരവധി തൊഴിലാളികളിൽ കൊറോണ വൈറസ് ബാധ കണ്ടെത്തിയതിനെ തുടര്‍ന്ന് കഴിഞ്ഞ മാർച്ചിലാണ് ഇന്‍ഡസ്ട്രിയല്‍ ഏരിയ സ്ട്രീറ്റ് 1 മുതല്‍ 32 വരെ ലോക്ക്ഡൗണ്‍ ചെയ്തത്.
