September 15, 2019
September 15, 2019
സൗദിയുടെ സമ്പദ്ഘടനയെ തന്നെ കാര്യമായി ബാധിക്കുന്നതാണ് കഴിഞ്ഞ ദിവസം അരാംകോയുടെ പ്രധാനപ്പെട്ട രണ്ട് എണ്ണ സംസ്കരണ കേന്ദ്രങ്ങൾ ലക്ഷ്യമാക്കി ഹൂതികൾ കഴിഞ്ഞ ദിവസം നടത്തിയ ആക്രമണം.
റിയാദ്: കൂടുതല്‍ ലാഭമുള്ള അന്താരാഷ്ട്ര കമ്പനികളുടെ കൂട്ടത്തില്‍ ഏറ്റവും മുന്‍നിരയിലുള്ള സൗദി അരാംകോയുടെ സ്ഥാപനങ്ങള്‍ അടക്കം വിവിധ സൗദി സ്ഥാപനങ്ങള്‍ക്കു നേരെ ഹൂതി വിമതർ നടത്തുന്ന ആക്രമണപരമ്പരയിലെ ഒടുവിലത്തേത് മാത്രമാണ് കഴിഞ്ഞ ദിവസമുണ്ടായത്.കഴിഞ്ഞ രണ്ടു വര്‍ഷത്തിനിടെ മാത്രം അരാംകോയുടെ വിവിധ സ്ഥാപനങ്ങള്‍ ഉൾപെടെ സൗദിയിലെ എണ്ണ-ഇന്ധന, സൈനിക, വ്യോമയാന കേന്ദ്രങ്ങള്‍ ലക്ഷ്യമിട്ട് നിരവധി ആക്രമണങ്ങളാണു നടന്നത്. ഇതിൽ സൗദിയുടെ സമ്പദ്ഘടനയെ തന്നെ കാര്യമായി ബാധിക്കുന്നതാണ് കഴിഞ്ഞ ദിവസം അരാംകോയുടെ പ്രധാനപ്പെട്ട രണ്ട് എണ്ണ സംസ്കരണ കേന്ദ്രങ്ങൾ ലക്ഷ്യമാക്കി ഹൂതികൾ കഴിഞ്ഞ ദിവസം നടത്തിയ ആക്രമണം.
2015 ൽ യമനില്‍ സൗദി സഖ്യം സൈനികമായി ഇടപെട്ടു തുടങ്ങിയതിന് ശേഷമാണ് ഹൂതികള്‍ സൗദിക്കു നേരെ തിരിച്ചടി ശക്തമാക്കിയത്. കഴിഞ്ഞ രണ്ടു വര്‍ഷത്തിനിടെ ഹൂതികള്‍ സൗദിയില്‍ നടത്തിയ ആക്രമണത്തിന്റെ വിശദ വിവരങ്ങൾ :
2018 ജനുവരി 5: നജ്‌റാന്‍ പ്രവിശ്യയില്‍ ഹൂതി മിസൈല്‍ ആക്രമണത്തിനു നീക്കം. ഇതു കണ്ടെത്തി സൗദി സൈന്യം തകര്‍ത്തു.
മാര്‍ച്ച് 31: വീണ്ടും നജ്‌റാന്‍ ലക്ഷ്യമിട്ടു ഹൂതികള്‍ അയച്ച മിസൈല്‍ സൗദി സേന തകര്‍ത്തു.
ജൂണ്‍ 24: റിയാദിനു നേരെ വന്ന രണ്ട് ബാലിസ്റ്റിക് മിസൈലുകള്‍ വ്യോമസേന തകര്‍ത്തു.
ജൂലൈ 25: ചെങ്കടലില്‍ യമന്‍ തുറമുഖമായ ഹുദൈദയ്ക്കു സമീപം സൗദി എണ്ണക്കപ്പല്‍ ലക്ഷ്യമിട്ട് ഹൂതി ആക്രമണം. കാര്യമായ കേടുപാടുകള്‍.
ഓഗസ്റ്റ് 9: ദക്ഷിണ ജിസാന്‍ പ്രവിശ്യയ്ക്കു നേരെ വന്ന രണ്ട് ഹൂതി മിസൈലുകള്‍ സൈന്യം തകര്‍ത്തു.
2019 ഏപ്രില്‍ 3: ഖമീസ് മുശൈത്ത് ലക്ഷ്യമിട്ട് വന്ന ഹൂതി ഡ്രോണുകള്‍ സഖ്യസേന തകര്‍ത്തു.
മാര്‍ച്ച് 14: പടിഞ്ഞാറന്‍ റിയാദില്‍ അരാംകോയുടെ കിഴക്കു-പടിഞ്ഞാറന്‍ പൈപ്പ്‌ലൈനുകൾക്ക് നേരെ ഹൂതി ഡ്രോണ്‍ ആക്രമണം. കനത്ത നാശനഷ്ടങ്ങള്‍.
മെയ് 20: ജിദ്ദ, മക്ക നഗരങ്ങള്‍ ലക്ഷ്യമാക്കി വന്ന രണ്ട് ബാലിസ്റ്റിക് മിസൈലുകൾ സൗദി സൈന്യം തകര്‍ത്തു.
ജൂണ്‍ 17: അബഹ വിമാനത്താവളം ഹൂതി ഡ്രോണ്‍ ആക്രമിച്ചു.
ജൂണ്‍ 20: ജിസാനിലെ പവര്‍‌സ്റ്റേഷനു നേരെ ഹൂതി ക്രൂയിസ് മിസൈല്‍ ആക്രമണം
ജൂലൈ രണ്ട്: അബഹ വിമാനത്താവളം ലക്ഷ്യമാക്കി വീണ്ടും ഹൂതി ആക്രമണം. ഇന്ത്യക്കാരി ഉൾപെടെഏഴു പൗരന്മാര്‍ക്കു പരിക്ക്.
ഓഗസ്റ്റ് 1: ദമാം തുറമുഖം ലക്ഷ്യമാക്കി ദീര്‍ഘദൂര മിസൈല്‍ ആക്രമണം.
ഓഗസ്റ്റ് 17: കിഴക്കന്‍ സൗദിയിലെ എണ്ണ-പ്രകൃതി വാതക പാടത്തേക്ക് ഹൂതി ഡ്രോണ്‍ ആക്രമണം. അഗ്നിബാധ.
ഓഗസ്റ്റ് 25: ജിസാന്‍ വിമാനത്താവളത്തിനു നേരെ ബാലിസ്റ്റിക് മിസൈല്‍ ആക്രമണം
ഓഗസ്റ്റ് 26: റിയാദില്‍ സൈനിക കേന്ദ്രം ലക്ഷ്യമാക്കി ഹൂതി ആക്രമണം.
സെപ്റ്റംബര്‍ 10: സൗദിയിലെ സആദ പ്രവിശ്യ ലക്ഷ്യമിട്ടുള്ള ഡ്രോണ്‍ ആക്രമണ ശ്രമം സഖ്യേ സേന തകര്‍ത്തു.
സെപ്റ്റംബര്‍ 14: അരാംകോയുടെ രണ്ടു പ്രധാന എണ്ണഫാക്ടറികള്‍ക്കു നേരെ നടന്ന ഡ്രോണ്‍ ആക്രമണത്തിന്റെ ഉത്തരവാദിത്തം ഹൂതികള്‍ ഏറ്റെടുത്തു.കനത്ത നാശനഷ്ടങ്ങൾ.അഗ്നിബാധ.രണ്ടു സംസ്കരണ കേന്ദ്രങ്ങളിലും ഉത്പാദനം നിർത്തിവെച്ചു.
