March 31, 2020
March 31, 2020
ദോഹ : ദോഹ ഇൻഡസ്ട്രിയൽ ഏരിയയിലെ ഹസം മുബൈരിക് ജനറൽ ആശുപത്രിയെ കോവിഡ് പ്രതിരോധ പ്രവർത്തനങ്ങൾക്ക് മാത്രമുള്ള ഇടമായി ഹമദ് മെഡിക്കൽ കോർപറേഷൻ പ്രഖ്യാപിച്ചു. കഠിനമായ രോഗലക്ഷണങ്ങളുള്ള രോഗികളെ ആയിരിക്കും ഇനി കൂടുതലായും ഇവിടെ ചികിത്സിക്കുക.
തീവ്രപരിചരണ വിഭാഗത്തിൽ 42 ഉം ഇൻപേഷ്യന്റ് വാർഡിൽ 105 ഉം ഉൾപ്പെടെ 147 കിടക്കകളാണ് നിലവിൽ ആശുപത്രിയിലുള്ളത്. 471 കിടക്കകൾ, 221 ഐസിയു, 250 ഇൻപേഷ്യന്റ് വാർഡ് എന്നിങ്ങനെയായി ശേഷി വർദ്ധിപ്പിക്കാനാണ് തീരുമാനം.. 150 അടിയന്തര കോവിഡ് കേസുകൾ വരെ ചികിത്സിക്കുന്നതിനുള്ള സൗകര്യവുമുണ്ടാകും.
പകർച്ചവ്യാധിയെ നേരിടാൻ ആരോഗ്യമേഖല സ്വീകരിക്കുന്ന സജീവമായ ഇടപെടലിന്റെ മികച്ച ഉദാഹരമാണിതെന്ന് പൊതുജനാരോഗ്യ മന്ത്രി ഡോ. ഹനൻ മുഹമ്മദ് അൽ കുവാരി പറഞ്ഞു. രോഗികളുടെ എണ്ണത്തിൽ എന്തെങ്കിലും വർദ്ധനവ് ഉണ്ടാവുകയാണെങ്കിൽ, അതിനെ നേരിടാൻ സജ്ജമായിരിക്കുക എന്ന ലക്ഷ്യത്തിലാണ് ഈ തീരുമാനം എടുത്തതെന്ന് ഹസം മുബൈരിക് ആശുപത്രിയിലെ ഡോ. സാദ് അൽ കാബി പറഞ്ഞു.
എല്ലാ രാജ്യങ്ങളിലെയും പുരുഷന്മാർക്കും സ്ത്രീകൾക്കും ചികിത്സ നൽകാനുള്ള ആധുനികവും നൂതനവുമായ അന്തരീക്ഷം ഇവിടെയുള്ളതിനാലാണ് ജനറൽ ആശുപത്രിയെ പ്രത്യേകമായി തിരഞ്ഞെടുത്തത് എന്നും അദ്ദേഹം കൂട്ടിച്ചേർത്തു.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന ഖത്തർ വാട്സാപ്പ് നമ്പറിലേക്ക് നിങ്ങളുടെ പേര് സന്ദേശമായി അയക്കുക.
