July 28, 2019
July 28, 2019
മക്ക: അനുമതിയില്ലാതെ ഹജ്ജിനായി മക്കയില് പ്രവേശിക്കുന്നവര്ക്ക് കടുത്ത പിഴയും നാടുകടത്തലും ശിക്ഷ. ഇവരെ സഹായിച്ചവര്ക്കും പിഴ ഉള്പ്പെടെയുള്ള ശിക്ഷ നല്കുമെന്ന് ഹജ്ജ് മന്ത്രാലയംഅറിയിച്ചു. നിയമലംഘകരെ കടത്തുന്നതിന് ഉപയോഗിച്ച വാഹനം പിടിച്ചെടുക്കാനും വ്യവസ്ഥയുണ്ട്.
ഹജ്ജ് മന്ത്രാലയം നല്കുന്ന ഔദ്യോഗിക അനുമതി പത്രമില്ലാതെ ഹജ്ജിനെത്തുന്ന ആഭ്യന്തര തീര്ത്ഥാടകര്ക്കെതിരെയാണ് കടുത്ത പിഴ ഉള്പ്പെടയുള്ള ശിക്ഷാനടപടികള് സ്വീകരിക്കുക. ഇത്തരം നിയമ ലംഘകരെ മക്കയിലെത്തിക്കുന്നതിന് സഹായം നല്കുന്നവരെയും പിടിക്കപ്പെട്ടാല് ശിക്ഷക്ക് വിധേയമാക്കും. വാഹനങ്ങളില് നിന്നാണ് പിടിക്കപ്പെടുന്നതെങ്കില് ഡ്രൈവര്ക്കെതിരെയും വാഹന ഉടമക്ക് ഏതിരെയുമാണ് നടപടി സ്വീകരിക്കുക.
ജയിലും കടുത്ത പിഴയും ഉള്പ്പെടുന്നതാണ് സഹായികള്ക്ക് ഉള്പ്പെടെയുള്ള ശിക്ഷ. ആദ്യ തവണ പിടിക്കപ്പെടുന്നവരെ പതിനഞ്ച് ദിവസത്തെ ജയില് വാസത്തിനും പതിനായിരം റിയാല് പിഴയും ഈടാക്കും. രണ്ടാം തവണ പിടിക്കപ്പെട്ടാല് രണ്ട് മാസം ജയിലും ഇരുപത്തിഅയ്യായിരം റിയാല് പിഴയും ഒടുക്കണം.
മൂന്നാം തവണയും പിടിക്കപ്പെട്ടാല് അന്പതിനായിരം റിയാല് പിഴയും ആറ് മാസം ജയില്വാസവും അനുഷ്ടിക്കണം ഒപ്പം പിടിക്കപ്പെടുന്നയാള് വിദേശിയാണെങ്കില് ആജീവനാന്ത വിലക്കോട് കൂടി നാടുകടത്തപ്പെടുകയും ചെയ്യും. ഇതിന് പുറമെ നിയമ ലംഘകരെ കടത്തുന്നതിന് ഉപയോഗിച്ച വാഹനം പിടിച്ചെടുക്കുന്നതിനും മന്ത്രാലയം പുറത്തിറക്കിയ സര്ക്കുലറില് വ്യവസ്ഥ ചെയ്തിട്ടുണ്ട്.