November 14, 2019
November 14, 2019
ദോഹ: ദോഹയിൽ നടക്കാനിരിക്കുന്ന അറേബ്യൻ ഗൾഫ് കപ്പ് ടൂർണമെന്റിനുള്ള ടിക്കറ്റ് വില്പന താൽകാലികമായി നിർത്തിവെച്ചതായി സംഘാടകർ അറിയിച്ചു. സൗദി അറേബ്യ, യു.എ.ഇ, ബഹ്റൈൻ എന്നീ രാജ്യങ്ങൾ കൂടി ടൂർണമെന്റിൽ പങ്കെടുക്കുമെന്ന് അറിയിച്ചതിനെ തുടർന്ന് തിയ്യതിയും ഷെഡ്യുളും പുതുക്കി നിശ്ചയിക്കുന്നതിന്റെ ഭാഗമായാണ് നടപടി. അതേസമയം,മത്സരങ്ങൾ കാണാൻ നേരത്തെ ടിക്കറ്റെടുത്തവർക്ക് അധിക തുക നൽകാതെ തന്നെ പുതിയ ടിക്കറ്റ് അനുവദിക്കും. പുതിയ ടിക്കറ്റുകൾ പുറത്തിറക്കിയാൽ സൂഖ് വാഖിഫ്, കത്തറ, മാൾ ഓഫ് ഖത്തർ, വില്ലാജിയോ മാൾ, ദോഹ ഫെസ്റ്റിവൽ സിറ്റി എന്നിവിടങ്ങളിൽ നിന്ന് പഴയ ടിക്കറ്റുകൾ മാറ്റിയെടുക്കാം. ടീം നറുക്കെടുപ്പ് പൂർത്തിയായാൽ ഇന്ന് തന്നെ ടിക്കറ്റ് വിൽപന പുനരാരംഭിക്കുമെന്നും സംഘാടകർ അറിയിച്ചിട്ടുണ്ട്. ശേഷം പഴയ ഗൾഫ് കപ്പ് ടിക്കറ്റുകൾ അധിക തുക നൽകാതെ മാറ്റിയെടുക്കാം.
ഖത്തറിൽ നടക്കുന്ന 24-മത് അറേബ്യൻ ഗൾഫ് കപ്പിൽ പങ്കെടുക്കില്ലെന്ന് നേരത്തെ അറിയിച്ചിരുന്ന സൗദി അറേബ്യ, യു.എ.ഇ, ബഹ്റൈൻ എന്നീ രാജ്യങ്ങൾ അവസാന നിമിഷം പങ്കെടുക്കാൻ സന്നദ്ധത അറിയിച്ചതോടെയാണ് തിയതിയും ഷെഡ്യൂളും മാറ്റേണ്ടിവന്നത്. ഇ-ടിക്കറ്റ് എടുത്തവരുടെ അക്കൗണ്ടുകളിലേക്ക് പത്തു ദിവസത്തിനകം തുക തിരിച്ചയക്കും. നേരത്തെ നിശ്ചയിച്ചതിൽ നിന്നു വ്യത്യസ്തമായി ഈ മാസം 26 മുതൽ ഡിസംബർ 8 വരെയാണ് ടൂർണമെന്റ് നടക്കുക.