December 27, 2020
December 27, 2020
ദോഹ : ജനുവരി അഞ്ചിന് റിയാദിൽ ചേരാനിരിക്കുന്ന ഗൾഫ് ഉച്ചകോടിക്ക് മുന്നോടിയായി ഗൾഫ് രാജ്യങ്ങളിലെ വിദേശകാര്യ മന്ത്രിമാർ ഇന്ന് യോഗം ചേർന്നു.സൗദി അറേബ്യ,യു.എ.ഇ,ബഹ്റൈൻ,ഒമാൻ,കുവൈത്ത് എന്നീ രാജ്യങ്ങളിലെ വിദേശകാര്യ മന്ത്രിമാർ പങ്കെടുത്ത യോഗത്തിൽ ഖത്തറിനെ പ്രതിനിധീകരിച്ച് വിദേശകാര്യ സഹമന്ത്രി സുൽത്താൻ ബിൻ സാദ് അൽ മുറൈഖിയാണ് പങ്കെടുത്തത്. ഖത്തർ വിദേശകാര്യ മന്ത്രിയും ഉപപ്രധാനമന്ത്രിയുമായ ശൈഖ് മുഹമ്മദ് ബിൻ അബ്ദുൽ റഹ്മാൻ അൽതാനി യോഗത്തിൽ പങ്കെടുത്തില്ലെന്നാണ് ലഭ്യമായ വിവരം.വെർച്വലായാണ് വിദേശകാര്യ മന്ത്രിമാർ യോഗം ചേർന്നത്.
ഇറാനെതിരെ ഐക്യനിര കെട്ടിപ്പടുക്കാനുള്ള അമേരിക്കൻ നീക്കത്തിന് തടയിടുകയും ജിസിസി രാജ്യങ്ങളുടെ ഐക്യത്തിന് ഭംഗം വരുത്തുകയും ചെയ്ത ഗൾഫ് പ്രതിസന്ധി പരിഹരിക്കാനുള്ള മാർഗങ്ങളെ കുറിച്ച് വിദേശകാര്യ മന്ത്രിമാർ ചർച്ച നടത്തിയതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു. അതേസമയം,പ്രതിസന്ധി പരിഹരിക്കാനുള്ള അന്തിമ കരാർ സംബന്ധിച്ച് വ്യക്തത ലഭിച്ചിട്ടില്ല.
ചർച്ചകൾ അന്തിമഘട്ടത്തിൽ എത്തിയെങ്കിലും അന്തിമകരാർ സംബന്ധിച്ച കാര്യങ്ങൾ പുരോഗമിക്കുകയാണെന്ന് ഗൾഫ് സഹകരണ കൗൺസിലുമായി ബന്ധപ്പെട്ട പ്രതിനിധി റോയിട്ടേഴ്സിനോട് പറഞ്ഞു.
ന്യൂസ്റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന വാട്സ്ആപ് നമ്പറിൽ സന്ദേശമയക്കുക