June 19, 2020
June 19, 2020
ദോഹ : ഖത്തറിൽ നിന്നും പ്രവാസി സംഘടനകളുടേതല്ലാത്ത ആദ്യ ചാർട്ടേർഡ് വിമാനം ഇന്ന് രാവിലെ പതിനൊന്നു മണിയോടെ കേരളത്തിലേക്ക് യാത്രതിരിച്ചു. അക്ബർ ട്രാവൽസിന്റെ ആദ്യ വിമാനമാണ് അഞ്ച് കൈക്കുഞ്ഞുങ്ങൾ ഉൾപെടെ 178 യാത്രക്കാരുമായി കൊച്ചിയിലേക്ക് പുറപ്പെട്ടത്. യാത്രക്കാരായ രണ്ടു പേരെ ഒഴിവാക്കിയാണ് സ്‌പൈസ് ജെറ്റ് വിമാനം യാത്ര തിരിച്ചത്. ഇതിൽ ഒരാളുടെ ഇഹ്തിറാസ് മൊബൈൽ ആപ്പിൽ ഇന്നലെ രാത്രി ചുവപ്പ് തെളിഞ്ഞതോടെ യാത്ര മാറ്റിവെക്കുകയായിരുന്നു.എക്സിറ്റ് പെർമിറ്റുമായി ബന്ധപ്പെട്ട പ്രശ്നത്തെ തുടർന്നാണ് മറ്റൊരാളുടെ യാത്ര മുടങ്ങിയത്.
1350 റിയാലാണ് അക്ബർ ട്രാവൽസ് കൊച്ചിയിലേക്ക് ടിക്കറ്റ് നിരക്ക് ഈടാക്കുന്നത്. 25 മുതൽ 30 കിലോ വരെ ലഗ്ഗേജ് അനുവദിച്ചിട്ടുണ്ട്.നാളെ(ജൂൺ 20) രാവിലെ 10.25 ന് കോഴിക്കോട്ടേക്കാണ് അക്ബർ ട്രാവൽസിന്റെ അടുത്ത സർവീസ്.
അതേസമയം,കേരളാ ബിസിനസ് ഫോറം(കെ.ബി.എഫ്) ഏർപ്പെടുത്തിയ ചാർട്ടേഡ് വിമാനം നേരത്തെ നിശ്ചയിച്ച സമയത്തിലും മൂന്നു മണിക്കൂർ വൈകിയാണ് ബോർഡിങ് ആരംഭിച്ചത്.രാവിലെ 10.55 നു പുറപ്പെടേണ്ടിയിരുന്ന വിമാനം പിന്നീട് 12.25 ന് പുറപ്പെടുമെന്ന് അറിയിച്ചിരുന്നെങ്കിലും സാങ്കേതിക കാരണങ്ങളാൽ വീണ്ടും അനിശ്ചിതമായി വൈകുകയായിരുന്നു. ഉച്ചക്ക് രണ്ടു മണിയോടെ വിമാനം പുറപ്പെടും.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന ഖത്തർ വാട്സാപ്പ് നമ്പറിലേക്ക് നിങ്ങളുടെ പേര് സന്ദേശമായി അയക്കുക
