December 14, 2019
December 14, 2019
ദോഹ : ഖത്തറിനെതിരെ കഴിഞ്ഞ രണ്ടര വർഷത്തിലേറെയായി തുടരുന്ന ഉപരോധം കാരണം എല്ലാവരും ബുദ്ധിമുട്ടുകയാണെന്നും ഉപരോധം പിൻവലിക്കുന്നത് എല്ലാവരുടെയും ജീവിതം എളുപ്പമാക്കുമെന്നും ഇറ്റലിയിലെ എണ്ണ-പ്രകൃതി വാതക കമ്പനിയായ ഇ.എൻ.ഐ യുടെ സി.ഇ.ഒ ക്ലൗഡിയോ ഡിസൽസി അഭിപ്രായപ്പെട്ടു. നല്ല രീതിയിലുള്ള ആശയവിനിമയവും ബന്ധവും തുടരുന്നത് എല്ലാവർക്കും കാര്യങ്ങൾ എളുപ്പമാക്കും.
ദോഹ ഫോറത്തിൽ പങ്കെടുക്കാനെത്തിയ അദ്ദേഹം സി.എൻ.ബി.സി ചാനലിന് നൽകിയ അഭിമുഖത്തിലാണ് ഇക്കാര്യം പറഞ്ഞത്.
ഉപരോധം കാരണം ഞങ്ങൾ ഇപ്പോൾ തന്നെ നിരവധി പ്രശ്നങ്ങൾ നേരിടുന്നുണ്ട്. നിലവിലെ സാഹചര്യം കാരണം എല്ലാവരും നിരവധി പ്രശ്നങ്ങൾ നേരിടുകയാണ്. സമാധാനം എല്ലാവർക്കും നല്ലതു വരുത്തുമെന്നും അദ്ദേഹം കൂട്ടിച്ചേർത്തു.
നിരവധി രാഷ്ട്ര നേതാക്കളും ബിസിനസ് പ്രമുഖരും നയതന്ത്ര പ്രതിനിധികളും പങ്കെടുക്കുന്ന ദോഹ ഫോറത്തിന് ഇന്ന്രാ വിലെയാണ് തുടക്കമായത്. ഷെറാട്ടൺ ഗ്രാൻഡ് ദോഹ റിസോർട്ട് ആൻഡ് കൺവെൻഷൻ സെന്ററിൽ ഇന്ന് രാവിലെ ഖത്തർ അമീർ ഷെയ്ഖ് തമീം ബിൻ ഹമദ് അൽതാനി ഫോറം ഉത്ഘാടനം ചെയ്തു. മലേസ്യൻ പ്രധാനമന്ത്രി ഡോ.മഹാതിർ മുഹമ്മദ്, യു.എൻ ജനറൽ അസംബ്ലി പ്രസിഡന്റ് പ്രൊഫസർ തിജ്ജാനി മുഹമ്മദ് ബന്ധെ,പ്രമുഖ മാധ്യമ പ്രവർത്തക കൂടിയായ ഗീഥ ഫഖ്‌റി എന്നിവരാണ് ഉത്ഘാടന സെഷനിൽ പങ്കെടുത്തത്. ആഗോള വിഷയങ്ങൾ ചർച്ച ചെയ്യുന്ന സമ്മേളനത്തിൽ വിവിധ രാഷ്ട്ര നേതാക്കളും 250 ലധികം സംവാദകരും ഉൾപെടെ മൂവായിരത്തോളം പ്രതിനിധികളാണ് പങ്കെടുക്കുന്നത്. ഇന്നും നാളെയുമായാണ് ദോഹ ഫോറം നടക്കുന്നത്.
ഖത്തറിൽ നിന്നും ഗൾഫ് - അറബ് മേഖലയിൽ നിന്നുമുള്ള ഏറ്റവും പുതിയ വാർത്തകൾ മുടങ്ങാതെ ലഭിക്കാൻ ഇതുവരെ ഒരു ഗ്രൂപ്പിലും അംഗങ്ങളാവാത്തവർ +974 66200167 എന്ന വാട്സ് ആപ് നമ്പറിലേക്ക് സന്ദേശം അയക്കുക.
