September 08, 2019
September 08, 2019
തെഹ്‌റാന്‍: ആണവ കരാര്‍ വാഗ്ദാനങ്ങള്‍ പൂര്‍ത്തീകരിക്കുന്നതില്‍ യൂറോപ്യന്‍ രാജ്യങ്ങള്‍ പരാജയപ്പെട്ടതായി ഇറാന്‍ ആണവോര്‍ജ സമിതി തലവന്‍. ആറ്റമിക് എനര്‍ജി ഓര്‍ഗനൈസേഷന്‍ ഓഫ് ഇറാന്‍ ഡയരക്ടര്‍ അലി അക്ബര്‍ സാലിഹിയാണ് കരാറിന്റെ ഭാഗമായ മറ്റു കക്ഷികള്‍ക്കെതിരെ വിമര്‍ശവുമായി രംഗത്തെത്തിയത്. ഇറാന്‍ കൂടുതല്‍ കരാര്‍ വ്യവസ്ഥാ പിന്മാറ്റം പ്രഖ്യാപിച്ചതിനു പിറകെ ആണവ ഗവേഷണ-പരീക്ഷണ നടപടികള്‍ ആരംഭിക്കുകയും ചെയ്തിട്ടുണ്ട്.
നിര്‍ഭാഗ്യകരമെന്നോണം തങ്ങളുടെ വാഗ്ദാനങ്ങള്‍ പാലിക്കുന്ന കാര്യത്തില്‍ യൂറോപ്യന്‍ കക്ഷികള്‍ പരാജയപ്പെട്ടിരിക്കുകയാണ്. കരാര്‍ ഒരു ദിശയിലേക്കു മാത്രമുള്ള തെരുവല്ല. ഘട്ടംഘട്ടമായി വ്യവസ്ഥകള്‍ ഉപേക്ഷിക്കുകയാണ് ഇറാന്‍ ചെയ്തത്. അതിനനുസരിച്ചുള്ള നടപടികളുമായി മുന്നോട്ടു പോകും-സാലിഹ് അറിയിച്ചു. നേരത്തെ തെഹ്‌റാനിലെത്തിയ യു.എന്‍ ആണവോര്‍ജ ഏജന്‍സി തലവന്‍ കോര്‍ണല്‍ ഫെറൂറ്റയുമായി കൂടിക്കാഴ്ച നടത്തിയതിനു പിറകെയാണ് അലി അക്ബര്‍ സാലിഹി മാധ്യമങ്ങളോട് ഇക്കാര്യം വ്യക്തമാക്കിയത്.
മറ്റു കക്ഷികള്‍ തങ്ങളുടെ വാഗ്ദാനങ്ങള്‍ നടപ്പാക്കാത്ത കാലത്തോളം ആണവ കരാര്‍ വ്യവസ്ഥകള്‍ ഉപേക്ഷിക്കുന്നത് ഇറാന്‍ തുടരുമെന്നും അദ്ദേഹം കൂട്ടിച്ചേര്‍ത്തു.
