September 17, 2019
September 17, 2019
ദുബായ് : ദുബായിൽ ഭർത്താവ് കുത്തിക്കൊന്ന കൊല്ലം തിരുമുല്ലാവാരം പുന്നത്തല അനുഗ്രഹയിൽ ചന്ദ്രശേഖരൻ നായരുടെ മകൾ സി. വിദ്യാ ചന്ദ്രന്റെ(40) മൃതദേഹം നാളെ (ബുധൻ) നാട്ടിലേയ്ക്ക് കൊണ്ടുപോകും. ദുബായിൽ നിന്നു വൈകിട്ടുള്ള എയർ ഇന്ത്യയുടെ തിരുവനന്തപുരം വിമാനത്തിലാണ് മൃതദേഹം കൊണ്ടുപോവുക.വിദ്യയുടെ മൃതദേഹം നാളെ രാവിലെ 11ന് ദുബായ് മുഹൈസിനയിലെ മെഡിക്കൽ ഫിറ്റ്നസ് സെന്ററിൽ എംബാം ചെയ്യും. ആളുകൾക്ക് മൃതദേഹം കാണാനുള്ള സൗകര്യമുണ്ടായിരിക്കും. ചേഞ്ച് എ ലൈഫ്, സേവ് എ ലൈഫ് വാട്സ് ആപ്പ് കൂട്ടായ്മയിലെ പ്രവർത്തകരാണ് മൃതദേഹം നാട്ടിലേയ്ക്ക് കൊണ്ടുപോകാനുള്ള നടപടികൾക്ക് നേതൃത്വം നൽകിയതെന്ന് നന്തി നാസർ അറിയിച്ചു.
ഈ മാസം ഒൻപതിന് ഭർത്താവ് തിരുവനന്തപുരം നേമം സ്വദേശി യുഗേഷ്(43) ആണ് വിദ്യയെ കൊലപ്പെടുത്തിയത്. ഒാണമാഘോഷിക്കാൻ നാട്ടിലേയ്ക്ക് പുറപ്പെടാനിരിക്കെ സന്ദർശക വീസയിൽ യുഎഇയിലെത്തിയ പ്രതി രാവിലെ അൽഖൂസിൽ വിദ്യ ജോലി ചെയ്യുന്ന കമ്പനിയിലെത്തി വിദ്യയെ വിളിച്ചു വരുത്തി പാർക്കിങ്ങിലേക്ക് കൊണ്ടുപോയി കുത്തിക്കൊലപ്പെടുത്തുകയായിരുന്നു.കൊലപാതകത്തിനു ശേഷം കടന്നുകളഞ്ഞ ഇയാളെ മണിക്കൂറുകൾക്കകം പൊലീസ് പിടികൂടി. 16 വർഷം മുൻപായിരുന്നു ഇവരുടെ വിവാഹം. ഏറെ കാലമായിരുന്നു ഇരുവരും തമ്മിൽ സ്വരച്ചേർച്ചയിലല്ലായിരുന്നു.
ദുബായ് അൽഖൂസിലെ ഒരു സ്വകാര്യ കമ്പനിയിൽ ഫിനാൻസ് വിഭാഗത്തിലായിരുന്നു വിദ്യ ജോലി ചെയ്തിരുന്നത്. 10,11 ക്ലാസുകളിൽ പഠിക്കുന്ന രണ്ട് പെൺമക്കൾ നാട്ടിൽ വിദ്യയുടെ മാതാപിതാക്കളോടൊപ്പമാണ് താമസം.