December 13, 2019
December 13, 2019
ദോഹ : 2019 ലെ ഖത്തർ ദേശീയ ദിനാഘോഷങ്ങൾക്ക് ദോഹയിലെ ദർബൽസായി മൈതാനിയിൽ തുടക്കമായി. ഇന്നലെ ഉച്ചയ്ക്ക് മൂന്നു മണിയോടെയാണ് ആഘോഷ പരിപാടികൾക്ക് ഔദ്യോഗികമായി തുടക്കം കുറിച്ചത്. പോലീസ് കോളേജിലെ 320 ഓളം വിദ്യാർഥികൾ മൂന്ന് ഗ്രൂപ്പുകളായി തിരിഞ്ഞു ദേശീയഗാനാലാപനത്തോടെ ദേശീയ പതാക ഉയർത്തി. തുടർന്ന് ദേശസ്നേഹവും അഭിമാനവും വിളിച്ചോതുന്ന വിവിധ പരിപാടികൾ പ്രധാന വേദിയിൽ അരങ്ങേറി.
10 ദിവസം നീളുന്ന ദർബൽസായിയിലെ ആഘോഷ പരിപാടികൾ ഈ മാസം 20 വരെ തുടരും. രാവിലെയും വൈകുന്നേരവും രണ്ടു സമയങ്ങളിലായാണ് ദർബൽസായിയിൽ സന്ദർശനത്തിന് അനുമതിയുണ്ടാവുക. വെള്ളിയാഴ്ചകൾ ഒഴികെയുള്ള ദിവസങ്ങളിൽ രാവിലെ 9 മുതൽ ഉച്ചയ്ക്ക് 1 വരെയും വൈകീട്ട് 3.30 മുതൽ രാത്രി 10 വരെയുമാണ് സന്ദർശകരെ അനുവദിക്കുക. വെള്ളിയാഴ്ചകളിൽ ഉച്ച കഴിഞ്ഞു 2 മുതൽ രാത്രി 11 മണി വരെ ദർബൽസായി സന്ദർശിക്കാം.
പ്രധാനമായും കുട്ടികളെ ആകർഷിക്കുന്ന വിനോദ - ബോധവൽകരണ പരിപാടികളാണ് ഇവിടെ ഒരുക്കിയിട്ടുള്ളത്. വിവിധ കൂടാരങ്ങളിലായാണ് വ്യത്യസ്ത പരിപാടികൾ നടക്കുക.ആഭ്യന്തര മന്ത്രാലയം,മുനിസിപ്പൽ-പരിസ്ഥിതി മന്ത്രാലയം, ഖത്തർ ചാരിറ്റി,ഖത്തർ യൂണിവേഴ്‌സിറ്റി,സുപ്രീം കമ്മറ്റി ഫോർ ഡെലിവറി ആൻഡ് ലെഗസി എന്നിവയുടെ പവലിയനുകളും ദർബൽസായിയിൽ ഒരുക്കിയിട്ടുണ്ട്.
