December 15, 2019
December 15, 2019
ദോഹ : ദോഹ തുറമുഖത്ത് വൻ തോതിലുള്ള ആയുധ കള്ളക്കടത്ത് പിടികൂടിയെന്ന തരത്തിൽ സമൂഹമാധ്യമങ്ങളിൽ പ്രചരിക്കുന്ന വാർത്ത അടിസ്ഥാനരഹിതമാണെന്ന് ജനറൽ കസ്റ്റംസ് അതോറിറ്റി അറിയിച്ചു. തുറമുഖത്ത് യന്ത്രത്തോക്കുകൾ നിരത്തിവെച്ച ഫോട്ടോ സഹിതമാണ് കഴിഞ്ഞ ദിവസങ്ങളിൽ ട്വിറ്റർ ഉൾപെടെയുള്ള സമൂഹ മാധ്യമങ്ങളിൽ ഇത്തരമൊരു വാർത്ത പ്രചരിച്ചത്. എന്നാൽ ഇത് കളിത്തോക്കുകൾ മാത്രമാണെന്നും യാഥാർത്ഥമല്ലെന്നും കസ്റ്റംസ് വിഭാഗം ട്വീറ്റ് ചെയ്തു.
പെയിന്റ് ബോൾ ഗെയിമിനായി ഉപയോഗിക്കുന്ന ചായങ്ങൾ നിറച്ച പന്തുകൾ അടങ്ങിയത് കൊണ്ടാണ് ഇവ യഥാർത്ഥ തോക്കുകളായി തോന്നുന്നതെന്നും അധികൃതർ വ്യക്തമാക്കി. ഇത്തരം കളിപ്പാട്ടങ്ങൾ സാധാരണഗതിയിൽ രാജ്യത്തെ വിപണിയിൽ ലഭ്യമല്ല. പ്രത്യേക അനുമതി വാങ്ങിയ ശേഷം മാത്രമേ ഇത്തരം കളിപ്പാട്ടങ്ങൾ ഇറക്കുമതി ചെയ്യാൻ അനുമതിയുള്ളൂ. എന്നാൽ ആവശ്യമായ അനുമതി വാങ്ങാതെ ഇറക്കുമതി ചെയ്ത ഉത്പന്നങ്ങളായതിനാൽ തുറമുഖത്ത് തടഞ്ഞുവെക്കുകയായിരുന്നു. ഇതിന്റെ ചിത്രങ്ങൾ എടുത്താണ് ചില കേന്ദ്രങ്ങൾ ദോഹ തുറമുഖത്ത് വൻതോതിൽ ആയുധങ്ങൾ പിടികൂടിയെന്ന തരത്തിൽ സമൂഹ മാധ്യമങ്ങൾ വഴി തെറ്റായ വാർത്ത പ്രചരിപ്പിച്ചത്.
സ്ഥിരീകരണമില്ലാത്ത വാർത്തകൾ സമൂഹമാധ്യമങ്ങൾ വഴി പ്രചരിപ്പിക്കരുതെന്ന് രാജ്യത്തെ പൗരന്മാരോടും താമസക്കാരോടും കസ്റ്റംസ് അതോറിറ്റി നിർദേശിച്ചു. ഇത്തരക്കാർക്കെതിരെ ആവശ്യമായ നിയമനടപടികൾ സ്വീകരിക്കുമെന്നും അതോറിറ്റി മുന്നറിയിപ്പ് നൽകിയിട്ടുണ്ട്.
ഖത്തറിൽ നിന്നും ഗൾഫ് - അറബ് മേഖലയിൽ നിന്നുമുള്ള ഏറ്റവും പുതിയ വാർത്തകൾ മുടങ്ങാതെ ലഭിക്കാൻ ഇതുവരെ ഒരു ഗ്രൂപ്പിലും അംഗങ്ങളാവാത്തവർ +974 66200167 എന്ന വാട്സ് ആപ് നമ്പറിലേക്ക് സന്ദേശം അയക്കുക.