November 14, 2019
November 14, 2019
ദോഹ: ബനി ഹജർ ഇന്റർചേഞ്ചിന്റെ ഏതാനും ഭാഗങ്ങൾ ഇന്നു മുതൽ അടച്ചിടുമെന്ന് അശ്ഗാൽ അറിയിച്ചു. ദുഖാൻ മുതൽ ബനി ഹജർ വരെയും ബനി ഹജർ മുതൽ ദോഹ വരെയുമാണ് ഇന്ന് മുതൽ ഞായറാഴ്ച വരെ അടയ്ക്കുന്നത്. ഈ മാസം 22 മുതൽ 24 വരെയും ഇവിടെ ഗതാഗതം നിയന്ത്രണം തുടരും.
ഖലീഫ അവന്യു പദ്ധതിയുടെ ഭാഗമായുള്ള ടാറിടൽ പ്രവൃത്തികൾക്കായാണ് ഇവിടെ ഗതാഗത നിയന്ത്രണം ഏർപ്പെടുത്തുന്നത്. ഈ സമയങ്ങളിൽ ദുഖാനിൽനിന്ന് സർവീസ് റോഡ് വഴി ബനി ഹജറിൽ പോകുന്നവർ നേരെ ദുഖാൻ റോഡിൽ നിന്ന് ഗറാഫത് റയ്യാൻ ഇന്റർചേഞ്ചിലേക്ക് തിരിഞ്ഞു ബനി ഹജറിലേക്ക് യു-ടേൺ എടുത്തുപോകണം. ശഹാമ സ്ട്രീറ്റ് വഴി ബനി ഹജറിൽ നിന്ന് ദോഹയിലേക്ക് പോകുന്നവർ വജ്ബ ഇന്റർചേഞ്ചിലേക്ക് കടന്ന് ദോഹയിലേക്ക് പോകണം.
ജനറൽ ട്രാഫിക് ഡയറക്ടരേറ്റുമായി ചേർന്നാണ് പൊതുമരാമത്ത് വകുപ്പ് ഗതാഗത നിയന്ത്രണം ഏർപ്പെടുത്തിയത്. പുതിയ ഗതാഗത പരിഷ്ക്കരണം അറിയിച്ച് ബന്ധപ്പെട്ട സ്ഥലങ്ങളിൽ സൂചനാ ബോഡുകൾ സ്ഥാപിക്കുമെന്ന് അശ്ഗാൽ അറിയിച്ചു.