November 09, 2019
November 09, 2019
ന്യൂഡല്ഹി : ഇന്ന് രാവിലെ പുറത്തുവന്ന അയോധ്യ- ബാബരി മസ്ജിദ് വിധിക്ക് സമൂഹ മാധ്യമങ്ങളിൽ മികച്ച പ്രതികരണം. വിധി പുറത്തുവന്നതിനു പിന്നാലെ ട്വിറ്ററില് ഹാഷ് ടാഗുകളുടെ പ്രളയമാണ്. ട്രെന്ഡ് ഹിന്ദു-മുസ്ലിം ഭായ് ഭായിക്ക് തന്നെ.'വിധിയുടെ ഉള്ളക്കം എന്തായാലും ഇന്ന് ചരിത്രപരമായ ദിനമാണ്. ചരിത്രം നമ്മളെ സമാധാനത്തിന്റെയും, ഐക്യത്തിന്റെയും വക്താക്കളായി ഓര്മ്മിക്കണം. വിദ്വേഷവും, വേര്തിരിവും പരത്തുന്നവരെ എതിരിടാന് സ്നേഹവും, ഒരുമയും പ്രകടിപ്പിച്ചെന്ന് ഉറപ്പാക്കാം. നമുക്ക് മനുഷ്യത്വത്തെ ട്രെന്ഡിംഗ് ആക്കാം', ഹിന്ദുമുസ്ലീം ഭായിഭായി ടാഗിനൊപ്പം ഒരു ട്വിറ്റര് ഉപയോക്താവ് കുറിച്ചു.
മണിക്കൂറുകൾക്കുള്ളിലാണ് 'അയോധ്യവിധി' ആഗോളതലത്തില് തന്നെ ടോപ്പ് ട്രെന്ഡ് പട്ടികയില് എത്തിയത്. 206കെ ട്വീറ്റുകളുമായാണ് ഈ ട്രെന്ഡിംഗ്. ഹിന്ദുമുസ്ലീം ഭായിഭായി ആഗോളതലത്തില് നാലാമതും എത്തി, 18.7കെയിലേറെ ട്വീറ്റുകളാണ് ഈ ടാഗുമായി പോസ്റ്റ് ചെയ്യപ്പെട്ടത്.
ആഗോളതലത്തിലെ ആദ്യ പത്ത് ട്രെന്ഡുകളില് മൂന്നെണ്ണം ഭൂമിതര്ക്ക വിഷയത്തെക്കുറിച്ചാണ്. ഇന്ത്യയിലെ ട്രെന്ഡില് പത്തെണ്ണവും അയോധ്യ വിധിയെക്കുറിച്ചുള്ളതാണ്.