April 08, 2020
April 08, 2020
ദോഹ : കോവിഡ് വ്യാപനത്തിന്റെ പശ്ചാത്തലത്തിൽ ഭക്ഷ്യോത്പന്നങ്ങൾ വിൽപന നടത്തുന്ന കടകളും ഫാർമസികളും റെസ്റ്റോറന്റുകളിലെ ഹോം ഡെലിവറിയും ഒഴികെയുള്ള എല്ലാ കടകളും വാണിജ്യ സ്ഥാപനങ്ങളും വാരാന്ത്യങ്ങളിൽ പൂർണമായും അടച്ചുപൂട്ടാൻ മന്ത്രിസഭ ഉത്തരവിട്ടു. പ്രധാനമന്ത്രിയും ആഭ്യന്തര മന്ത്രിയുമായ ശെയ്ഖ് ഖാലിദ് ബിൻ ഖലീഫാ ബിൻ അബ്ദുൽ അസീസ് അൽതാനിയുടെ അധ്യക്ഷതയിൽ ചേർന്ന മന്ത്രിസഭാ യോഗമാണ് ഇക്കാര്യം തീരുമാനിച്ചത്.ഭക്ഷ്യ വിതരണ സ്ഥാപനങ്ങൾ,ഫാർമസികൾ,എന്നിവ പ്രവർത്തിക്കും. റസ്റ്റോറന്റുകൾക്ക് ഹോം ഡെലിവറിയും ടേക്ക് എവേ സൗകര്യവും തുടരും. ഇതൊഴികെയുള്ള രാജ്യത്തെ മുഴുവൻ സ്ഥാപനങ്ങളും വെള്ളി,ശനി ദിവസങ്ങളിൽ പൂർണമായും അടച്ചിടണമെന്നാണ് നിർദേശം. ഇനിയൊരു അറിയിപ്പുണ്ടാകുന്നത് വരെ ഇത് പ്രാബല്യത്തിലുണ്ടാകും.
നിയന്ത്രണം കര്ശനമാക്കിയ ശേഷം ഇളവനുവദിച്ച മറ്റെല്ലാ സ്ഥാപനങ്ങൾക്കും നിയമം ബാധകമായിരിക്കും. നേരത്തെ ഇളവനുവദിച്ച മുഴുവൻ സ്ഥാപനങ്ങളും ഇതോടെ വാരാന്ത്യങ്ങളിൽ അടഞ്ഞു കിടക്കും.അല്ലാത്ത ദിവസങ്ങളിലും മന്ത്രാലയം നിർദേശിച്ച മേഖലകളിലെ സ്ഥാപനങ്ങൾക്ക് മാത്രമേ പ്രവർത്തിക്കാൻ അനുമതിയുള്ളൂ. ഇത്തരം സ്ഥാപനങ്ങൾക്കും വൈകുന്നേരം ഏഴു മണിവരെ മാത്രമാണ് തുറന്ന് പ്രവർത്തിക്കാൻ അനുമതിയുള്ളത്.പുതിയ ഉത്തരവോടെ ഇത്തരം സ്ഥാപനങ്ങളും വാരാന്ത്യങ്ങളിൽ പ്രവർത്തിക്കാൻ പാടില്ല.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന ഖത്തർ വാട്സാപ്പ് നമ്പറിലേക്ക് നിങ്ങളുടെ പേര് സന്ദേശമായി അയക്കുക.
