December 16, 2020
December 16, 2020
ദോഹ : ഖത്തർ പൊതുജനാരോഗ്യ മന്ത്രാലയത്തിന് കീഴിലെ മുഐതർ,അൽ ഗരാഫ ആരോഗ്യ കേന്ദ്രങ്ങളിലെ രജിസ്റ്റർ ചെയ്ത രോഗികൾക്കുള്ള പ്രവർത്തനം സാധാരണ നിലയിൽ പുനരാരംഭിച്ചതായി അധികൃതർ അറിയിച്ചു.കോവിഡ് വ്യാപനത്തെ തുടർന്ന് കഴിഞ്ഞ മാർച്ചിൽ ഹമദ് മെഡിക്കൽ കോർപറേഷനുമായി സഹകരിച്ച് ഈ രണ്ട് ആരോഗ്യ കേന്ദ്രങ്ങളിലും സാധാരണ രോഗികൾക്ക് നിയന്ത്രണം ഏർപെടുത്തിയിരുന്നു. പകരം,കോവിഡുമായി ബന്ധപ്പെട്ട പരിശോധനകൾ മാത്രമാണ് ഇവിടെ നടത്തിയിരുന്നത്..നിലവിൽ അൽ ഗരാഫ ഹെൽത്ത് സെന്റർ നേരത്തെയുള്ള സമയക്രമം അനുസരിച്ചു തന്നെ പ്രവർത്തനം പുനരാരംഭിച്ചിട്ടുണ്ട്.എന്നാൽ മുഐതർ ഹെൽത്ത് സെന്റർ ഡിസംബർ 20 നു മാത്രമേ നേരത്തെയുണ്ടായിരുന്ന സമയക്രമം അനുസരിച്ച് പ്രവർത്തനം തുടങ്ങൂ.അതേസമയം,റൗദത്ത് അൽ ഖൈൽ,ഉംസലാൽ പ്രാഥമികാരോഗ്യ കേന്ദ്രങ്ങളിൽ ഇനി ഒരു അറിയിപ്പ് ഉണ്ടാകുന്നതുവരെ കോവിഡ് പരിശോധനകൾക്ക് മാത്രമായി തുടരും.
പ്രൈമറി ഹെൽത്ത് കെയർ കോർപറേഷൻ ഓപറേഷൻസ് എക്സിക്യൂട്ടീവ് ഡയറക്റ്റർ ഡോ.സമയ അബ്ദുല്ലയാണ് ഇക്കാര്യം അറിയിച്ചത്. അൽ ഗരാഫ,മുഐതർ പ്രാഥമികാരോഗ്യ കേന്ദ്രങ്ങളിൽ രജിസ്റ്റർ ചെയ്ത എല്ലാ രോഗികൾക്കും ഇനി മുതൽ ഈ കേന്ദ്രങ്ങളിലെ സേവനങ്ങൾ പഴയ രീതിയിൽ തന്നെ പ്രയോജനപ്പെടുത്താമെന്നും അവർ പറഞ്ഞു.
ന്യൂസ്റൂം വാർത്തകൾ മുടങ്ങാതെ ലഭിക്കാൻ :
TELEGRAM
FACEBOOK PAGE
https://www.facebook.com/newsroomme