December 02, 2019
December 02, 2019
ദോഹ : ഖത്തർ ദേശീയ ഫുടബോൾ താരവും അൽസദ് ക്ലബ് സ്‌ട്രൈക്കറുമായ അക്രം അഫീഫ് ഏഷ്യൻ ഫുട്‍ബോൾ കോൺഫെഡറേഷന്റെ ഈ വർഷത്തെ മികച്ച കളിക്കാരനായി തെരഞ്ഞെടുക്കപ്പെട്ടു. ഏഷ്യൻ രാജ്യങ്ങളിലെ ഏറ്റവും മികച്ച കളിക്കാരനുള്ള 'പ്ലെയർ ഓഫ് ദി ഇയർ 2019'പുരസ്കാരമാണ് ഈ 22 കാരനെ തേടിയെത്തിയത്. ഇന്ന് (തിങ്കൾ) ഹോങ്കോങ്ങിൽ നടന്ന ചടങ്ങിലാണ് പുരസ്കാരം പ്രഖ്യാപിച്ചത്.
പുരസ്‌കാരത്തിന് അക്രം അഫീഫ് എ.എഫ്.സിക്ക് നന്ദി അറിയിച്ചു.
'ഖത്തർ ടീം മാനേജ്മെന്റിനും ടീം അംഗങ്ങൾക്കും അൽ സദ്ദ് ക്ലബ്ബിനും ആസ്പയറിനും എന്നെ പിന്തുണച്ച എല്ലാവർക്കും ഞാൻ നന്ദി അറിയിക്കുന്നു. എനിക്ക് ഏറ്റവും വലിയ പിന്തുണ നൽകിയ എന്റെ കുടുംബത്തിനും നന്ദി. ഖത്തർ ദേശീയ ടീമിനൊപ്പമായതിനാൽ ഇപ്പോൾ അവിടെയെത്തി പുരസ്കാരം സ്വീകരിക്കാൻ കഴിയില്ല. എ.എഫ്.സിക്കും എന്നെ പിന്തുണച്ച എല്ലാവർക്കും ഒരിക്കൽ കൂടി നന്ദി.' സമൂഹമാധ്യമങ്ങളിൽ പോസ്റ്റ് ചെയ്ത വീഡിയോ സന്ദേശത്തിൽ അഫീഫ് പ്രതികരിച്ചു.
അൽ സദ്ദ് പരിശീലകൻ സാവി ഹെർണാണ്ടസ് അക്രം അഫീഫിനു വേണ്ടി പുരസ്കാരം ഏറ്റുവാങ്ങി. അറേബ്യൻ ഗൾഫ് കപ്പിൽ ഇന്ന് യു.എ.ഇയുമായി നിർണായക മത്സരം നടക്കാനിരിക്കെ ലഭിച്ച അംഗീകാരം അഫീഫിനും മറ്റ് കളിക്കാർക്കും കൂടുതൽ ആത്മവിശ്വാസം പകരും.
